"Ermənistanın Şuşadakı tarixi Azərbaycan məscidini bərpa etmək istəyi işğal etdiyi ərazilərdə mədəni-dini abidələrimizə qarşı həyata keçirdiyi vandalizm siyasətini ört-basdır etmək cəhdidir".

Bunu APA-ya Dini Qurumlarla İş üzrə Dövlət Komitəsi sədrinin müavini Gündüz İsmayılov qondarma Dağlıq Qarabağ Respublikası ilə İran şirkəti arasında Şuşadakı Yuxarı Gövhərağa məscidinin təmiri ilə bağlı imzalanan müqaviləyə münasibət bildirərkən bildirib.

G. İsmayılov deyib ki, ermənilər işğal olunmuş torpaqlarımızdan İslam dininə aid abidələrimizin demək olar ki, hamısını məhv ediblər. Qafqaz Albaniyası dövrünə aid alban məbədlərini isə ya qriqoryanlaşdırıblar, ya da bu mümkün olmadıqda dağıdıblar: "Bu reallıqları artıq dünya ictimaiyyəti bilir və Ermənistanın vandalizm siyasəti beynəlxalq aləmdə ifşa olunub. Buna görə də ermənilər “vəziyyəti dəyişmək üçün” cəhdlər göstərirlər. Amma artıq gecdir. Onlar ifşa ediliblər. O ki, qaldı bərpa işini hansısa müsəlman şirkətinin həyata keçirməsinə, bu, nə İslama, nə də insana yaraşan əməldir. Çünki ermənilər məscidlərdə heyvan saxlamaqla təkcə azərbaycanlıların yox, bütün müsəlmanların heysiyyatına toxunublar. Düşmən dəyirmanına su tökən bu cür müsəlmanlar beynəlxalq hüquq normalarına, Qarabağda yaşanan insanlıq faciəsinə hörmət etmirlər, heç olmasa inanclarına hörmət etsinlər. Təəssübkeş "müsəlman" şirkətləri həmin məscidlər dağıdılanda harada idilər? O vaxtlar niyə təəssübkeşlik göstərmirdilər?"