Bakıda keçirilmiş Mədəniyyətlərarası dialoq üzrə IV Beynəlxalq forumda BMT-nin Ərzaq və Kənd Təsərrüfatı Təşkilatının (FAO) xoşməramlı elçisi Leyla Əliyeva çıxış edib. Bu barədə virtualaz.org-un xüsusi müxbiri xəbər verir.

“Ərzaq təhlükəsizliyi və dayanıqlı cəmiyyət naminə mədəniyyətlərarası dialoq: stabil inkişafın və sülhün təminatının əsas elementləri” panelindəki çıxışında Leyla Əliyeva bildirib ki, ərzaq təhlükəsizliyinin təminatı, ətraf mühitin qorunması və sülhün təminatı mədəniyyətlərarası dialoq olmadan qeyri-mümkündür.

“Hələ də dünyada 870 milyon insan aclıq çəkir, yaxud lazım olan qədər yeyə bilmir, - Leyla Əliyeva deyib. - Yoxsulluq və aclıqla mübarizə birgə səylər tələb edir”. FAO-nun xoşməramlı səfiri hesab edir ki, ərzaq təhlükəsizliyinə xüsusi diqqət yetirilməlidir.

“Bu forum əlaqələrin qurulması və gələcəkdə birgə iş üçün rahat meydançadır”, - Leyla Əliyeva qeyd edib. O həmçinin bildirib ki, oktyabr ayında Bakıda FAO-nun ərzaq təhlükəsizliyi və dayanıqlı inkişaf məsələləri üzrə konfransı keçiriləcək.