Oktyabrın 4-də keçirilmiş iclasda Ermənistan hökuməti oktyabrın 5-də Milli Məclisin fövqəladə iclasının çağırılması üçün Ermənistan Respublikası Milli Məclisinin sədri Ara Babloyana müraciət etmək qərarına gəlib.

Moderator.az xəbər verir ki, Erməni nəşrlərinin yazdığına görə, buna səbəb oktyabrın 7-12-də Ermənistanda keçiriləcək Frankofoniya sammiti ilə əladar iki günü – 11-12 oktyabrı qeyri-iş günü elan etmək haqda qərar qəbul edilməsidir.

Baş nazir Nikol Paşinyan da hökumət üzvləri ilə görüşündə qeyd edib ki, 17-ci Frankofoniya sammiti ilə əlaqədar respublikada 2 gün istirahət günü olmalıdır. Bunun üçün parlamentdə bayramlar haqqında qanuna dəyişiklik edilməlidir.

17-ci Frankofoniya sammiti çərçivəsində 80-dən çox ölkə və təşkilatın nümayəndə heyətləri Ermənistana gələcəklər.

Qeyd edək ki, Frankofoniya 1970-ci ildə yaradılmış və fransızdilli, eləcə də Fransa ilə sıx əməkdaşlıq edən 58 ölkənin daxil olduğu təşkilatdır.

P.S. Ermənistan həm ağalarından, yolgöstərənlərindən biri, həm də ATƏT-in Minsk qrupunun həmsədrlərindən biri kimi Fransaya yaltaqlanmağı, ondan ötrü iki günü istirahət günü elan etməyi özünə şərəf sayır.