“Salyan Mərkəzi Xəstəxanasında iki yeni doğulan uşağın ölümü ilə bağlı “Azərişıq”ı günahlandırmaq düzgün deyil. Çünki hər xəstəxananın özünün generator var”.
Bunu hafta.az-a açıqlamasında “Azərişıq” Açıq Səhmdar Cəmiyyətinin mətbuat xidmətinin rəhbəri Tanrıverdi Mustafayev deyib. O, tezliklə qurumun mətbuat xidmətindən baş verən hadisə ilə bağlı ictimaiyyətə məlumat veriləcəyini bildirib.
Qeyd edək ki, Salyan şəhər Həsən Məmmədov küçəsi, ev 6 ünvanında yaşayan 21 yaşlı Mirzabitə İlham qızı Abdullayeva ötən gecə Salyan Rayon Mərkəzi Xəstəxanasının (RMX) doğum şöbəsinə yerləşdirilib. Onun ailə üzvlərinin sözlərinə görə, doğuş normal həyata keçirilib və ana üçəm dünyaya gətirib. Lakin doğuşdan 6 saat sonra xəstəxananın elektrik enerjisi kəsilib və şüşə altında saxlanılan körpələrdən ikisi oksigen çatışmazlığından ölüb, birinin isə vəziyyəti ağır olaraq qalır.