Paytaxtın Nizami rayonunda icra başçısının yaşıllıqları qırması davam edir. 24saat.org-a göndərilən fotolardan məlum olur ki, metronun "Neftçilər” stansiyası yaxınlığındakı ağaclar dibindən kəsilərək yerində çayxana tikilib. Siyəzən rayon icra başçısı vəzifəsindən Nizami rayonuna təyin olunan Arif Qasımovun yaşıllıqlara qənim kəsilməsi kommersiya maraqlarından irəli gəlir. Hazırda Nizami rayonunda kütləvi şəkildə ağacların kəsilməsi davam edir.

Metro çıxışında qırılan ağacların ərazisində "Fincan” kafesi fəaliyyətə başlayıb. A.Qasımov bu rayona rəhbər gələr-gəlməz ilk iş istiqamətlərindən biri "yaşıl qətliam” olub. Dəfələrlə bu haqda reportajlar yayımlansa da, Nizami RİH heç bir tədbir görmür. Bu rayona başçı kim təyin olunubsa oksigeni azaltmağı qarşısında məqsəd qoyub. A.Qasımov da xələflərindən geri qalmır.

24saat.org-a ünvanlanan fotolardan görünür ki, icra başçısı metronun düz yanında olan ağacları kəsərək ekoloji cinayətə yol verib. İş adamlarına həmin yerləri satan A.Qasımovu qətiyyən təbiəti qorumaq maraqlandırmır. Əsas ağaclar yox, kafe və çayxanaların bol olmasıdır. Arif Qasımovun "ağac soyqırımı” ilə məşğul olan mütəşəkkil dəstəsində yaxın dostu olduğu deyilən bir iş adamı xüsusi fəallıq edir. Qeyd edək ki. bir müddət əvvəl Qara Qarayev prospektində – "8-ci kilometr bazarı”nın yaxınlığında ağacların qırılması faktı qeydə alınıb.

Bundan başqa, hazırda metronun "Neftçilər” stansiyasından üzü "Xalqlar dostluğu” istiqamətinə gedəndə yolun sağında – 9 mərtəbəli binaların qarşısındakı yaşıllıqlar da məhv edilib və yerində təyinatı hələ bəlli olmayan obyektlər tikilir.

Ekologiya və Təbii Sərvətlər Nazirliyi tərəfindən aparılan araşdırma zamanı Şərurun Vərməziyar kənd sakini, sahibkar Mayis Əhmədov Ənvər oğlunun sərv və eldar şamı ağaclarını qırdığı aşkar edilib. Faktla əlaqədar İnzibati Xətalar Məcəlləsinin müvafiq maddələri ilə ona fiziki şəxs qismində cərimə tətbiq edilib.