"Senator Qremin "sarsıdıcı" sanksiya qanun layihəsi reallıqda dəyişikliklərə məruz qalacaq..."

ABŞ Senatında Rusiyaya qarşı hələ qəbul olunmamış, lakin çoxdan təqdim edilmiş yeni sanksiyalar haqqında qanun layihəsinin qəbul olunmazdan öncə ciddi şəkildə dəyişdiriləcəyi gözlənilir.

Moderator.az xəbər verir ki, bu barədə "Politico" nəşri məlumat yayıb.

Layihənin indiki versiyası Rusiya enerjidaşıyıcılarını alan ölkələrdən idxal olunan mallara 500 faizlik tarif tətbiqini nəzərdə tutur ki, bu da ilk növbədə ABŞ-ın ən böyük ticarət tərəfdaşları olan Çin, Hindistan və bir sıra Avropa ölkələri ilə iqtisadi münasibətlərin pozulması deməkdir.

Senator Lindsi Qrem artıq bu riskləri anlayaraq, bu həftənin əvvəlində Ukraynaya yardım edən ölkələrə istisna tətbiq olunmasını təklif edib. Bu istisna Avropa İttifaqını sanksiyalardan xilas edə bilərdi, çünki Avropa hələ də təqribən 20 faiz səviyyəsində Rusiya qazından asılıdır. Ancaq Avropa kənarda qalsa belə, layihə yenə də mübahisəli sayılır.

Nəşr yazır: "Birincisi, ABŞ özü hələ də Rusiya uranını alır, halbuki bu da Qrem layihəsinə daxil edilib. İkincisi, Çin və Hindistandan idxala yüksək tarif tətbiqi ABŞ-ın daxili bazarına zərbə vura bilər. Bu bazar, xüsusilə istehlak mallarında həmin ölkələrdən idxaldan asılıdır". Nəşr xəbərdarlıq edir ki, Çində istehsal olunan mallara 500 faizlik tarif qiymətlərin kəskin artımına, təchizat zəncirinin pozulmasına və işsizliyin artaraq resessiya səviyyəsinə çatmasına səbəb ola bilər.

Ekspert qiymətləndirmələri və siyasi dinamika

Siyasi analitik Mett Zveyq hesab edir ki, bu qanun layihəsi Konqresdə müzakirələr zamanı və ya Tramp administrasiyası ilə ilkin razılaşmalar mərhələsində ciddi düzəlişlərə məruz qalacaq və bu proses vaxt aparacaq.

Zveyq deyir ki, sanksiya qanunvericiliyi ilə işləyərkən, adətən hər detal üzrə tədrici və mərhələli proses tələb olunur. Buna baxmayaraq, layihə iki partiyanın dəstəyini qazanıb, bu isə ABŞ siyasi dairələrinin Rusiyanı cəzalandırmaq istəyi ilə izah olunur.

"Gibson Dunn" hüquq firmasının tərəfdaşı Adam Smit bildirir ki, Konqres icra hakimiyyətinə təzyiq edir ki, daha sərt addımlar atsın. Senatda belə bir hiss var ki, Rusiyaya qarşı sanksiyalar ya artırılmalıdır, ya da bu istiqamətdə hərəkət edilməlidir.

Tramp və Rusiya: qeyri-rəsmi münasibətlər və mediada şayiələr

Nəşr xatırladır ki, ABŞ mediası bu yaxınlarda Ağ Evin senator Lindsi Qremə təzyiq etdiyini, ondan qanun layihəsini yumşaltmağı tələb etdiyini yazıb. Mənbələrə görə, Donald Tramp bu qanunun qəbulundan sonra Putinlə dostluq münasibətlərini davam etdirə bilməyəcəyindən narahatdır. Bununla belə, Tramp ictimai çıxışlarında deyib ki, əgər ehtiyac yaranarsa, Rusiyaya qarşı əlavə sanksiyalar tətbiq etməyə hazırdır. Amma hələlik belə bir ehtiyac görmədiyini bildirib.