"Qaydalara görə, Azərbaycan Respublikasında bütün yerlərdə, o cümlədən taksilərdə qeyri-nağd ödənişlər qəbul olunmalıdır. Lakin praktikada sürücülərin sərnişinlərin qeyri-nağd ödənişlərini qəbul edə bilməməsi halları müşahidə olunur. Əvvəlcədən sərnişin öz profilində qeyri-nağd ödənişi seçirsə, ödəniş sərnişinin hesabından sürücüyə köçürülməlidir".

Bunu Demokrat.az-a açıqlamasında nəqliyyat eksperti Eldəniz Cəfərov deyib.

O, bildirib ki, prblemlər taksi şirkətlərinin ödənişləri sürücülərə vaxtında çatdırmamasından yaranır:

"Bu səbəbdən bir çox hallarda sürücülər sərnişinləri qəbul etməkdən imtina edirlər. Taksi şirkətləri öz nöqsanlarını aradan qaldırmalı və sürücülərə qeyri-nağd ödənişləri vaxtında köçürməlidirlər. Bu, həm sərnişinlərin, həm də sürücülərin mənafelərini qoruyan əsas qaydadır. Eyni zamanda, müvafiq dövlət qurumları, məsələn, Vergi Xidməti, taksi şirkətlərində bu məsələyə nəzarət etməlidir".