Ermənilər ötən il istifadəyə verdikləri Göyçə-Kəlbəcər-Ağdərə yolu boyu bir neçə yerdə ictimai-iaşə obyektləri tikəcəklər.
Gununsesi.info “KarabakhTV”-yə istinadla yazır ki, bu haqda Xankəndindəki qondarma-separatçı rejimin “şəhərsalma naziri” hesab edilən Karen Şahnazaryan məlumat verib.
Onun sözlərinə görə, artıq göstərilən yolun kənarlarında bir neçə restoran, kafe və otelin layhələri bəzi şirkətlər və şəxslər tərəfindən hazırlanıb və təsdiqlənib. İki böyük obyektin tikintisini Qarabağın qızılını-misini istismar edən “Beyz-Metalz” şirkəti üzərinə götürüb. Onlardan biri Kəlbəcərin İstisu termal su mənbəyi yaxınlığında, digəri isə Heyvalı(ermənilər “Drmbon” deyir) kəndində tikiləcək. Ermənistan Futbol Federasiyasının prezident Ruben Ayrapetyan tərəfindən təqdim olunmuş digər layihənin Ermənistandan Ağdərəyə gələn yolun sağında – Xudavəng məbədinin yaxınlığında həyata keçiriləcəyi planlaşdırılır. Daha bir neçə belə layihənin olduğunu söyləyən K.Şahnazaryan bildirib ki, 1-2 ilə Kəlbəcər yolu boyu müasir standartlara tam cavab verəcək ictimai iaşə obyektlərinin tikintisi başa çatacaq.