Los-Anceles polisi amerikalı müğənni Ledi Qaqanın iki itini oğurlamaqda şübhəli bilinən beş nəfəri həbs edib.

“Report” xəbər verir ki, bu barədə ABC telekanalı məlumat yayıb.

Saxlanılan şəxslərə qarşı adam öldürməyə cəhd və soyğunçuluq ittihamları irəli sürülüb.

Bildirilib ki, müğənninin itlərini polis idarəsinə gətirən qadın isə həbs olunanlardan birinin tanışıdır.

Qeyd edək ki, fevralın 24-də naməlum şəxslər tərəfindən ifaçının köməkçisi, 30 yaşlı Rayan Fişerə dörd dəfə atəş açılıb. Onun gəzdirdiyi itlər isə cinayətkarlar tərəfindən oğurlanıb.

İtləri polis idarəsinə gətirən və adı açıqlanmayan qadın heyvanları küçədə tapdığını bildirmişdi.