İlk dəfə filmə çəkilən Rudi əvvəlcə maya dillərindən birini - yukateki öyrənməli olur. Dramatik filmlərdə aktyorlar yüksəkliklərdən tullanarkən, habelə digər gərgin səhnələrdə onları kaskadyorlar əvəz edirlər. Lakin yüksək səviyyəli atletik hazırlığı olan Rudi Yanqblad bu gərgin səhnələri, o cümlədən bir neçə metr hündürlüyə malik şəlalədən tullanışı məhz özü edir. Rudi Yanqblad ABŞ-ın Texas ştatının Belton şəhərində doğulub. O, iki bacısından və afroamerika əsilli anasından ibarət ailəsini dolandırmaq üçün erkən yaşlarında işləməyə başlayıb. Damarlarında komançe və yaki hindularının qanı axan Rudi erkən yaşlarında xərçəng xəstəliyinin hədələdiyi ölüm təhlükəsindən güclə xilas olub. Kinoya “Apokalipsis”dəki məşhur rolu ilə gəlmiş aktyor Rudi hazırda asudə vaxtlarında boksla, qaçışla, habelə rəssamlıqla məşğul olur.

Anar Tağıyev
TEREF