Təbriz İnqilab Prokurorluğunun 15 saylı şöbəsində 11-22 yanvar tarixlərində 12 azərbaycanlı fəalın ifadəsi alınıb.

Milli fəallar Yürüş Mehrəlibəyli, Araz İbrahimnejad, Davud Şiri, Hamid Yeganəpur, Cavad Sudbər, Məhəmmədrza Müvəhhid, Əli Babayi, Mehrdad Qadiri, Əmirhüseyn Ağayi, Mürtəza Nurməhəmmədi, Hüseyn Azadi və İbrahim Əvəzzadə Təbriz Ümumi və İnqilab Prokurorluğuna çağırılaraq, onlara qarşı irəli sürülmüş ittihamlarla bağlı ilkin müdafiələrini təqdim ediblər.

Bu fəallar 2023-cü ilin sentyabr ayından başlayaraq İran Azərbaycanının müxtəlif şəhərlərində təhlükəsizlik qüvvələri tərəfindən həbs edilib. Onların bir çoxu üç aydan artıq müddət ərzində saxlanılaraq intensiv dindirmələrə məruz qalıb. Dindirmə zamanı onlarla pis rəftar olunduğu və işgəncələrə məruz qaldırları bildirilib.

İnsan hüquqları üzrə fəaliyyət göstərən HRA xəbər agentliyi iclasın gedişi ilə bağlı məlumat yayıb. Bildirilir ki, Ərdəbil sakini olan fəal Nasir Rəzmcu məhkəmə iclaslarına çağırılmayıb. Halbuki ona Prokurorluğun bu şöbəsində iş açıldığı barədə bildiriş göndərilib.
Fəallara qarşı "sistemə qarşı fəaliyyət məqsədilə qanunsuz qrupa üzvlük" və "daxili və xarici təhlükəsizliyə qarşı cinayət törətmək məqsədilə toplaşmaq və əlbir olmaq" ittihamları irəli sürülüb. Bundan əlavə, Culfa sakini Yürüş Mehrəlibəyli "sistemə qarşı mübarizə məqsədilə qrup yaratmaq" ittihamı ilə də üzləşib.

Azərbaycanlı siyasi fəal Yürüş Mehrəlibəyli 2023-cü il noyabrın 7-də Culfa şəhərində təhlükəsizlik qüvvələri tərəfindən həbs edilərək Təbriz Kəşfiyyat İdarəsinin təcridxanasına köçürülmüşdü. O, ümumilikdə 104 gün (üç ay 12 gün) həbsdə saxlanılıb və 2024-cü il fevralın 18-də Təbriz Mərkəzi Həbsxanasından 2 milyard tümən mülki zəmanət qarşılığında müvəqqəti olaraq azadlığa buraxılıb.