Bir qrup milli fəal fevralın 16-da Ərdəbildə Beynəlxalq Ana Dili Günü ərəfəsində Azərbaycan türkcəsində nağıl kitabları paylayıb və şəhər daxilində vərəqələr yapışdıraraq ana dilində təhsilin vacibliyini vurğulayıb.

Sosial şəbəkələrdə yayılan görüntü və məlumatlara əsasən, fəallar məktəblərin qarşısına gələrək, Azərbaycan türkcəsində tədris materialları və hekayələr olan kitabları şagirdlər və onların valideynləri arasında paylayıblar. Fəalların bu addımı ana dilinin əhəmiyyəti və dil hüquqları ilə bağlı maarifləndirmə məqsədi daşıyır.

Bundan əlavə, Ərdəbildə bir qrup fəal şəhərin müxtəlif nöqtələrində vərəqələr yapışdırıb paylayaraq, İranda Azərbaycan türkləri üçün ana dilində təhsil hüququnun olmamasına etiraz ediblər.

Ərdəbildə milli fəallar Ana Dili Günü ərəfəsində maarifləndirmə fəaliyyəti aparıb
Hər il fevralın 21-də qeyd olunan Beynəlxalq Ana Dili Günü dil müxtəlifliyinin və ana dilində təhsil hüququnun vacibliyini vurğulayır.

İran Azərbaycanındakı milli fəallar da hakimiyyətin yaratdığı məhdudiyyətlərə baxmayaraq, bu cür maarifləndirmə fəaliyyətləri ilə ictimaiyyətin diqqətini dil məsələləri və mədəni hüquqların qorunmasına yönəltməyə çalışırlar.

İran İslam İnqilabından sonra qəbul edilən konstitusiyanın 15-ci maddəsində yerli xalqların dillərinin məktəblərdə və mediada sərbəst istifadəsinə icazə verildiyi qeyd olunsa da, son 45 il ərzində bu maddə kağız üzərində qalıb və heç vaxt icra olunmayıb.
Pəhləvilərin hakimiyyətə gəlməsindən sonra - qısa ömürlü Azərbaycan Milli Hökuməti dönəmini çıxmaq şərtilə - İran Azərbaycanında məktəblərdə türk dili heç vaxt tədris olunmayıb. İllər ərzində İslam Respublikası rəsmiləri türk dilinin məktəblərdə öyrədiləcəyi barədə müxtəlif vədlər versələr də, bu bəyanatlar heç zaman reallığa çevrilməyib.

2013-cü il prezident seçkiləri zamanı Həsən Ruhani vəd vermişdi ki, Azərbaycan türkcəsi İran məktəblərində tədris olunacaq. Bu açıqlama xüsusilə İranın türkdilli bölgələrində – Şərqi Azərbaycan, Qərbi Azərbaycan, Ərdəbil və Zəncanda geniş rezonans doğurmuşdu.
Seçki kampaniyası çərçivəsində Təbrizdə çıxış edən Ruhani İran Konstitusiyasının 15-ci maddəsinə istinad edərək yerli və etnik dillərin fars dili ilə yanaşı tədrisinin mümkün olduğunu bildirmişdi. Lakin onun prezidentliyi dövründə Azərbaycan türkcəsinin məktəblərdə tədrisi reallaşmadı.

Hər il Dünya Ana Dili Günü münasibətilə keçirilən tədbirlərdə iştirak edən yüzlərlə türk fəal nəzarət altına alınıb, həbs edilib və sürgün olunub.