Türkiyədə sosial şəbəkələr vasitəsilə boykot çağırışı edənlər və yayanlar haqqında təhqiqat başlayıb.

Oxu.Az "Haber Global" telekanalına istinadla xəbər verir ki, bu barədə İstanbul Baş Prokurorluğunun yaydığı məlumatda deyilir.

Bildirilir ki, bu cür çağırışı edənlərə və onu yayanlara münasibətdə Cinayət Məcəlləsinin nifrət və ayrıseçkilik, habelə xalqı kin və düşmənçiliyə təhrik etmə maddələri üzrə təhqiqat başlayıb:

"Bir müddətdir KİV və sosial şəbəkə vasitəsilə xalqın bir qisminin iqtisadi fəaliyyətlə məşğul olmasını əngəlləməyə yönəlik ritorikaya və onu yayanlara yönəlik təhqiqat başlayıb".

Xatırladaq ki, Cümhuriyyət Xalq Partiyasının (CHP) rəhbərliyi əhalini iqtidarla bağlı və ya ona yaxın bəzi şirkət və KİV-i boykot etməyə çağırmışdı. Çağırış İstanbulun korrupsiyada ittiham edilən meri Ekrem İmamoğlunun həbsi ilə bağlı edilib.