Türkiyədə aparıcı müxalifət partiyası olan Cümhuriyyət Xalq Partiyası (CHP) Türkiyə Böyük Millət Məclisindəki fəaliyyətini dayandıra bilər.

SalamNews-un “Haberler”-ə istinadla verdiyi xəbərə görə, bunu partiya sözçüsü Selin Sayek Böke bəyan edib.

Referendum nəticələrini tanımadıqlarını qeyd edən Böke bildirib: "Referendumun nəticəsi “bəli” olmadı və konstitusiya dəyişikliyi baş tutmadı. 16 apreldə keçirilmiş referendum nəticələri bizim üçün “yox” hökmündədir. Referendumun hər mərhələsində hiylə və saxtakarlığa yol verilib. Xalqın səsləri ilə əldə edilə bilməyən nəticə Ali Seçki Komissiyasının qurduğu yollarla və hiylə ilə əldə edilib. Bu referendum mübahisə mövzusu belə deyil. Referendum yenidən keçirilməlidir və CHP bunun üçün üzərinə düşən hər şeyi edəcək. Çünki xalqın iradəsi oğurlanıb”.

Böke vurğulayıb ki, CHP bu məqsədinə nail olmaq üçün, hətta TBMM-də partiya fəaliyyətini də dayandıra bilər.