UEFA Superkubokunun qalibi məlum olub - FOTOREPORTAJ

15-08-2019, 06:53           
UEFA Superkubokunun qalibi məlum olub - FOTOREPORTAJ
Türkiyənin İstanbul şəhərində keçirilən futbol üzrə UEFA Superkubokunun qalibi məlum olub.

"Report"un məlumatına görə, "Vodafone Park"da İngiltərənin iki təmsilçisi - "Liverpul" və "Çelsi" komandaları üz-üzə gəlib.

Həm əsas, həm də əlavə vaxtda tərəflər hərəyə bir dəfə fərqləniblər. Penaltilər seriyasında isə "zadəganlar" sonuncu zərbədə büdrəyiblər. Nəticədə "Liverpul" 5:4 hesablı qələbə sayəsində mövsümə titulla başlayıb.

Qeyd edək ki, ötən mövsüm "Liverpul" İspaniyanın paytaxtı Madriddə keçirilmiş final matçında "Tottenhem"i 2:0 hesabı ilə yenərək, Çempionlar Liqasının qalibi olub. "Çelsi" isə Bakı Olimpiya Stadionunda təşkil olunmuş Avropa Liqasının həlledici qarşılaşmasında "Arsenal"ı darmadağın edib - 4:1.

Görüşü ilk dəfə qadın referi idarə edib. Fransalı Stefani Frappara həmyerlisi Manuela Nikolazi və irlandiyalı Mişel O Nil yan xətt hakimləri kimi yardımçı olub. Dördüncü hakim funksiyasını türkiyəli kişi referi Cüneyt Çakır yerinə yetirib.

Hollandiyalı jurnalist Anton Vitkampın müəllifi olduğu UEFA Superkuboku uğrunda matç 1972/1973 mövsümündən keçirilməyə başlayıb. Əvvəlki 43 qarşılaşmanın 23-dən Çempionlar Liqasını qazanmış komanda qalib ayrılıb. Superkuboka hamıdan çox - hərəyə 5 dəfə İspaniyanın "Barselona" və İtaliyanın "Milan" klubları sahib olub. Ölkələr siyahısında isə ən çox qalib adını İspaniya qazanıb - 15 dəfə.

Bugünkü matç İngiltərə klublarının iştirakı ilə ilk Superkubok kimi tarixə düşüb. "Dumanlı Albion" təmsilçilərindən son olaraq, "Liverpul" 2005-ci ildə bu kuboka yiyələnib. Artıq "qırmızılar"ın ümumilikdə 4, "zadəganlar"da isə 1 belə titulu var.

14 avqust

UEFA Super Kuboku

23:00. "Liverpul" (İngiltərə) - "Çelsi" (İngiltərə) - 2:1 (ƏLAVƏ VAXT - 1:1, penaltilərlə - 5:4)

Qollar: Sadio Mane, 48;

95 - Olivye Jiru, 36. Jorjinyo, 101

Hakimlər: Stefani Frappar (Fransa), Manuela Nikolazi (Fransa), Mişel O Nil (İrlandiya), Cüneyt Çakır (Türkiyə)

VAR hakimi: Kleman Türpen (Fransa)

"Vodafone Park", İstanbul (Türkiyə).












Teref.az © 2015
TEREF - XOCANIN BLOQU günün siyasi və sosial hadisələrinə münasibət bildirən bir şəxsi BLOQDUR. Heç bir MEDİA statusuna və jurnalist hüquqlarına iddialı olmayan ictimai fəal olaraq hadisələrə şəxsi münasibətimizi bildirərərkən, sosial media məlumatlarındanda istifadə edirik! Nurəddin Xoca
Məlumat internet səhifələrində istifadə edildikdə müvafiq keçidin qoyulması mütləqdir.
E-mail: n_alp@mail.ru