"Lakin müraciətlərim nəticəsiz qalıb..." - GİLEY

25-09-2020, 11:56           
"Lakin müraciətlərim nəticəsiz qalıb..." - GİLEY
"Lakin müraciətlərim nəticəsiz qalıb..."
Uşaq evinin məzunu, 1990-cı il təvəllüdlü Zair Aslan oğlu Mirzəyev dövlət tərəfindən ona verilməli olan evin Nizami Rayon İcra Hakimiyyətinin keçmiş başçısı Arif Qasımov tərəfindən başqasına satıldığını iddia edib. DİA.AZ-ın məlumatına görə, Z.Mirzəyev bildirib ki, Xətai rayonunda yerləşən 3 saylı uşaq evindən məzun olub. Belə ki, 1993-cü ildən 2007-ci ilədək uşaq evində yaşayıb. Hazırda isə Dövlət Neft Şirkətinin Nizami rayonunda yerləşən yataqxanasında məskunlaşıb. “Uşaq evinin məzunu kimi mənzillə təmin olunmağım üçün Əmək və Əhalinin Sosial Müdafiə Nazirliyinə, Nizami Rayon İcra Hakimiyyətinə dəfələrlə müraciət etmişəm. Lakin müraciətlərim nəticəsiz qalıb”.

Şikayətçinin sözlərinə görə, Birinci vitse-prezident Mehriban Əliyevanın tapşırığı ilə 2013-cü ildə Nizami rayonu, Nəsimi küçəsi 2405-ci məhəllədə uşaq evlərinin məzunları üçün 68 məzilli bina tikilib. Binadakı 62 mənzil məhz uşaq evinin məzunu olanlara verilib. Lakin 5 mənzil digər şəxslərə satılıb. “Nizami Rayon İcra Hakimiyyətinin keçmiş başçısı Arif Qasımovun sayəsində həyatımın ikinci zərbəsini aldım. Belə ki, həmin binada 23 nömrəli ikiotaqlı mənzil mənə verilməli idi. Lakin başqa bir şəxsə-uşaq evinin məzunu olmayan Emin Sarafraziyə verildi”.

Z.Mirzəyev söyləyib ki, 2016-cı ildə SOCAR-ın qurumlarından birində işlə təmin edilib. Kimsəsiz olduğundan adı mənzil növbəsinə salınıb: “2017-ci ildə SOCAR rəsmisi tərəfindən siyahı tərtib olunub. Həmin siyahıda 23 saylı mənzilin mənə veriləcəyi qeyd edilmişdi. Uzun müddət gözlədim, nəhayət, bu il həmin mənzilin başqasına satıldığını öyrəndim”.

Z.Mirzəyev deyib ki, Nizami Rayon İcra Hakimiyyətinin keçmiş başçısı Arif Qasımov mənzilləri istədiyi şəxsə verməklə dövlətin qayğısına kölgə salıb: “İcra hakimiyyətindən bildirdilər ki, 23 saylı mənzildə yaşayan Emin Sarafrazi 1 saylı uşaq evinin məzunudur. Həmin müəssisəyə rəsmi sorğu göndərdim. Gələn cavab məktubunda göstərilir ki, 1 saylı uşaq evinin məzunları arasında Emin Sarafrazi adlı şəxs olmayıb. Sonradan mənzil kommunal istismar sahəsi araşdırma aparıb və bəlli olub ki, həmin mənzil Emin tərəfindən kirayəyə verilib.

Z.Mirzəyev onu da qeyd edib ki, ehtiyacı olduğu halda mənzilin bir başqasına verilməsini sübut etmək qərarına gəlib. İyulun 15-də ora gedib, qapını qırıb. Qonşuların şahidliyi ilə video görüntülər çəkməyə başlayb. Qarşı tərəf polisə müraciət edib, amma onu mənzildən xalça oğurlamaqda təqsirləndiriblər. Lakin araşdırma nəticəsində böhtan atldığı bəlli olub.

“Sonra məlum oldu ki, mənzil Emin Sarafrazinin anasına verilib, ondan oğluna qalıb. Halbuki qanuna görə sosial evlər valideyndən övlada qala bilməz, bu evləri bağışlamaq, kirayə vermək qadağandır. Həmin binada hans mənzillərin uşaq evlərinin məzunlarına verilmədiyini bilirəm. Keçmiş icra başçısı və onun yaxın dairəsi öz əməllərini gizlətmək üçün həmin şəxslərin guya aztəminatlı ailələr olduğunu göstərib”, - şikayətçi deyir.

Z.Mirzəyev bildirib ki, 30 yaşı var, mənzili olmadığndan ailə qura bilmir: “Əminəm ki, Birinci vitse-prezident Mehriban Əliyeva məsələdən xəbərdar olarsa, problemim dərhal həllini tapar. Buna görə də Mehriban Əliyevadan köməklik göstərməsini xahiş edirəm”.















Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.