"Kondisioner və sağlamlıq: soyuq hava, isti təhlükə..."

Yayın istisi hər kəsin ürəyincə olmur. Kimisi üçün bu, çimərlik və dondurma fəsli olsa da, başqaları üçün boğucu ev havası, ofisdə nəfəs almağın çətinləşməsi və yuxusuz gecələr deməkdir.

Moderator.az xəbər verir ki, bu barədə "ixbt.com" nəşri yazıb.

Nəşr qeyd edir ki, kondisioner belə vaxtlarda xilas kimi görünür. Amma onunla birlikdə tez-tez burun axması, boğazda qıcıqlanma və ya soyuqdəymə də gəlir. Bəs bu, niyə baş verir və necə qarşısını almaq olar?

Kondisioner niyə xəstə edir?

Əsas səbəb - qəfil soyuma və soyuq hava axınının birbaşa insana yönəlməsidir. İnsan orqanizmi temperatur dəyişikliklərinə çox həssasdır. Əgər çöldəki +35 dərəcə isti havadan birbaşa +18 dərəcəlik buz kimi otağa girsəniz, bədəniniz stres yaşayır. İmmunitet bu şoka cavab verə bilmir və səhər artıq özünüzü xəstə hiss edirsiniz. Ümumdünya Səhiyyə Təşkilatına görə, yay aylarında otaq üçün ideal temperatur Selsi üzrə 23-26 dərəcədir. Gecə yuxusu üçün 22-24 dərəcə aralığı daha münasib sayılır.

Bu temperatur niyə uyğundur?

Orqanizm stres keçirmir və immun sistem zəifləməz.
Ürəyə düşən yük azalır.
Hər bir dərəcə temperatur artımı enerji sərfiyyatını 3 faizə qədər azaldır.
Küçə ilə otaq arasındakı fərq 5-7 dərəcədən artıq olmamalıdır. Yəni çöldə +30 dərəcə olarkən otaqda 25 dərəcə yetərlidir.

Digər təhlükələr: soyuq axın, toz və quraqlıq

Havanın birbaşa insana yönəlməsi - Əgər kondisionerin hava axını boynunuza, çiyninizə və ya kürəyinizə birbaşa vurursa, boyun əzələlərinin iltihabı (miozit) və ya boğaz soyuqdəyməsi qaçılmaz olur. Havanın bərabər yayılması üçün cihazın jalüzlərini yuxarıya və ya yana yönəldin.
Çirkli filtrlər - Kondisionerin içində toz, kif və bakteriyalar toplanır və istifadə zamanı yenidən otağa qayıdır. Nəticədə sadəcə soyuqdəymə deyil, allergik öskürək də baş qaldıra bilər. Filtrləri hər 2-3 həftədən bir təmizləmək, ildə bir dəfə isə peşəkar servisə müraciət etmək vacibdir.
Quru hava - Kondisioner havanı qurudur, bu isə burun və boğazın selikli qişasının qurumasına gətirib çıxarır. Quruluq isə viruslara açıq qapıdır. İdeal rütubət 40-60 faiz arasıdır. Əgər otaq havası çox qurudursa, nəmləndirici cihaz işlədin və ya sadəcə otağa su dolu bir qab qoyun. Ən sadə üsul - islanmış dəsmalı radiatorun üzərinə sərməkdir.
Kondisioneri harada quraşdırmaq lazımdır?

Ən böyük səhv cihazı yatağın, divanın və ya iş masasının tam üstünə quraşdırmaqdır. Hava axını birbaşa insana yönəlməməli, otaqda dövr etməlidir. Ən münasib yer - pəncərənin qarşısındakı divarın yuxarı hissəsi və ya iş masasının yanıdır. Hava axını tavan boyunca və ya otağın mərkəzinə doğru yönəldilməlidir. Əgər kondisioner artıq düzgün quraşdırılmayıbsa, jalüzləri tənzimləməklə hava axınını yuxarı və ya yana yönəltmək olar.

Kondisioner açıqkən necə yatmalı?

Gecə üçün ən uyğun temperatur 22-24 dərəcədir. Kondisionerin "Sleep" və ya "Night" rejimini seçin - bu rejimlər gecə sərinliyi tədricən azaldaraq bədəni oyanmağa hazırlaşdırır. Əsla birbaşa hava axını altında yatmayın. Əvvəlcə otağı soyudub, sonra cihazı taymerlə söndürmək daha faydalıdır.

Soyuqdəymədən qorunmaq üçün nə etmək lazımdır?

Bol su için - quru hava selikli qişanı qurudur və bədəni zəiflədir.
Havanın rütubətini tənzimləyin - nəmləndirici cihaz və ya su qabı kömək edir.
Pəncərə və qapıları bağlı saxlayın - artıq hava axını ziyanlıdır.
İncə kofta geyinin - kondisioner altındasınızsa, bədənizi yüngülcə örtün.
Kondisioner düşmən deyil, amma...

Kondisionerin özü sizi xəstələndirmir - yanlış istifadə və diqqətsizlik xəstələndirə bilər. Qəfil temperatur dəyişiklikləri, birbaşa hava axını, çirkli filtrlər və quruluq - bunlar risk yaradır. Əgər kondisioneri düzgün quraşdırıb, təmizliyinə nəzarət etsəniz və bədəninizə bir az diqqət yetirsəniz, yay istisini problemsiz keçirə bilərsiniz.