İyul ayı ərzində Azərbaycanda internet istifadəçiləri "Google" axtarış sistemi üzərindən ən çox "Polad Həşimov" sözünü axtarışa veriblər.
"Google"nin açıqladığı nəticələrə istinadən bildirir ki, son bir ay ərzində Azərbaycanda internet istifadəçiləri "Polad Həşimov"dan əlavə "Google" üzərindən ən çox "Ceyhun Bayramov", "Necmeddin Sadiqov", "Meleyke Abbaszade” kimi sözləri yazaraq axtarışa veriblər.
Azərbaycanda internet istifadəçilərinin iyul ayı ərzində axtarışa verdiyi sözlər arasında "seferberlik”, "mudafie nazirliyi”, "kim kardashian”, "Azerbaycan bayragi”, "tovuz” kimi sözlər də ilk sıralarda yer alıb.
Məlumat üçün bildirək ki, son 30 gün ərzində Ermənistanda internet istifadəçiləri "Google" axtarış sistemi üzərindən ən çox "Xabkanq” ("Xəyanət”) adlı televizya serialının müxtəlif bölümlərini axtarışa veriblər. Ermənilərin iyul ayında ən çox axtardığı sözlər arasında "dimord emis am” (tələbə qəbulu ilə bağlı rəsmi sayt), "marqarita simonyan” kimi sözlər də ilk onluqda yer alıb.
Onu da qeyd edək ki, iyul ayının 13-ü tarixindən başlayaraq Ermənistan ordusu Azərbaycanın Tovuz rayonunu intensiv atəşə tutub. Davam edən döyüşlər zamanı Azərbaycan ordusunun general-mayoru Polad Həşimov şəhid olub. Bu səbəbdən də iyul ayı ərzində Azərbaycanda internet istifadəçiləri ən çox "Polad Həşimov" sözünü axtarışa veriblər.
Tovuz istiqamətində baş verən döyüşlər zamanı Ermənistan ordusunun da aralarında yüksək rütbəli zabitlərin olduğu onlarla hərbçisi öldürülüb. Maraqlıdır ki, Ermənistan ordusu onlarla hərbçini itirməsinə baxmayaraq bu ölkədə internet istifadəçilərini ən çox maraqlandıran televiziya serialı və qəbul imtahanları olub.(yeniavaz)