Duz və karbohidratların həddindən artıq olması səbəbindən bitki mənşəli ətlər qan şəkərinin tənzimlənməsini poza bilər və bununla da diabetə səbəb olar.

Bunu Sinqapur Milli Universitetinin alimləri müəyyən ediblər.

“Cebhe.info” xəbər verir ki, tədqiqatın nəticələri “American Journal of Clinical Nutrition” (AJCN) jurnalında dərc olunub.

Tədqiqatda 2-ci tip diabet inkişaf riski yüksək olan 89 Sinqapurlu iştirak edib. Onlar məruz qaldıqları səkkiz həftəlik pəhriz müdaxiləsinin növündən asılı olaraq iki qrupa bölündülər. Birinci qrupdakı subyektlər heyvan mənşəli məhsulların daxil olduğu adi pəhrizə riayət etməli idilər. İkinci qrupdakı iştirakçılardan təbii əti vegan (bitki əsaslı) alternativlərlə əvəz etmələri istənib.

Eksperimental dövrün sonunda tədqiqatçılar iştirakçıların qanında natrium, qlükoza və xolesterinin konsentrasiyalarını tədqiqatın əvvəlində olanlarla müqayisə ediblər. Onlar vegan pəhrizində olan subyektlərin qan şəkərinin daha az stabil olduğunu aşkar etdilər. Bu, o deməkdir ki, bitki mənşəli ət yemək əvvəlcədən riski olan iştirakçılarda şəkərli diabetin inkişaf ehtimalını artırıb.

Tədqiqatçılar həmçinin ət yeyənlərin qanında natrium səviyyəsinin bitki əsaslı pəhriz yeyənlərə nisbətən daha aşağı olduğunu müəyyən ediblər. Bədəndə həddindən artıq natrium şişməyə və qan təzyiqinin artmasına səbəb ola bilər ki, bu da öz növbəsində ürək - damar xəstəlikləri yaradır.

Alimlərin fikrincə, ikinci qrupdan olan iştirakçıların orqanizmində belə mənfi dəyişikliklər vegan ətində duz və karbohidratların çox olması ilə bağlı olub.