Avropa, Britaniya və ABŞ astronomlarından ibarət qrup qalaktikamızın yaxınlığında 34 ədəd cüt ağ cırtdan ulduz sistemi aşkarlayıb.

Gazeta.ru-nun verdiyi məlumata görə, tədqiqat DBL layihəsi çərçivəsində GAIA orbit teleskopu və WHT yerüstü teleskopundan istifadə edilərək aparılıb.

Alimlərin sözlərinə görə, onlardan biri - WDJ181058.67+311940.94 ulduz sistemi "Herkules" bürcündə, Yer kürəsindən 159 işıq ili uzaqlıqda yerləşir. Bu sistemdəki ağ cırtdanlar bir-birindən 2,5 milyon km məsafədədir (bu, Yer ilə Günəş arasındakı məsafədən 60 dəfə azdır) və onların ümumi kütləsi Günəşin kütləsini 1,55 dəfə üstələyir. Bu da onu Yerə ən yaxın 1a tipli supernova namizədi edir.

Ulduzların birləşməsi nəticəsində supernova partlayışının təxminən 23 milyard ildən sonra baş verəcəyi ehtimal edilir.

Mütəxəssislərin sözlərinə görə, belə sistemlərin yaxınlıqdakı qalaktikalarda aşkarlanması onların kifayət qədər çox olduğunu göstərir.

Cüt ağ cırtdanlar və ya neytron ulduzlarının birləşməsi nəticəsində yaranan 1a tipli supernovalar astronomlar üçün kosmik məsafələrin və kainatın genişlənmə sürətinin ölçülməsi baxımından böyük əhəmiyyət daşıyır. Bu kəşf, 1a tipli supernovaların necə formalaşdığına dair yeni ipucları verir.