Bu gün tanınmış iş adamı Füzuli Fərəcovun oğlu Ağaəli Fərəcov idarə etdiyi “Porsche” markalı 99-BS-999 dövlət nömrə nişanlı avtomobili ilə 24 yaşlı qızı vurub. Hadisə yerindən qaçan sürücünü polis əməkdaşları saxlaya bilib.

Bu nə ilk, nə də sonuncu belə hadisədir. Ümumiyyətlə, son illərdə biznesmen övladlarının, məmur balalarının törətdiyi qəzalarda çoxlu sayda sadə vətəndaş həyatını itirir. Bu qəzalara səbəb nədir? Ehtiyyatsızlıq, yüksək sürət, yoxsa özbaşınalıq?

Qaynar.az vəzifə sahiblərinin və biznesmen övladlarının törətdiyi qəzaları rəqdim edib:

Xatırlayırsınızsa bir neçə il öncə “Azərbaycan Xəzər Dəniz Gəmiçiliyi” QSC-nin sədr müavini olan Mübariz Mədətovun oğlu Xalid Mədətov “Mercedes-Benz G-55” markalı avtomobilini yüksək sürətlə idarə etdiyi üçün qəza törətmiş və hadisə nəticəsində Azərbaycan Respublikasının xalq artisti Ağasəlim Abdullayevin həyat yoldaşı və nəvəsi dünyasını dəyişmişdi. Bu cinayət cəzasız qalmadı. Xalid Mədətov vəzifəsindən uzaqlaşdırıldı, oğlu isə həbs olundu, lakin bir müddət əvvəl amnistiya ilə sərbəst buraxıldı.

Mübariz Mədətov

2016-cı ildə Respublika Klinikasının keçmiş baş həkimi, Səhiyyə Nazirliyinin Rəyasət Heyətinin üzvü olmuş Yuzasif Kərimovun oğlu Rəhim Kərimov “Real” Məhdud Məsuliyyətli Müəssisəyə məxsus olan “Mercedes-Benz S350” markalı avtomobili ilə yol hərəkət qaydasını kobud şəkildə pozaraq qəzaya səbəb olub və məhkəmə hakimi olan Elbəy Allahverdiyevin oğlu, ADA-nın 3-cü kurs tələbəsi olmuş Rüfət Allahverdiyev hadisə zamanı həyatını itirib.

Rüfət Allahverdiyev

Mətbuatda bir vaxtlar “Meliorasiya və Su Təsərrüfatı” ASC-nin tabeliyindəki Yuxarı Qarabağ Kanalı İstismar İdarəsinin rəisi İlyas Səfərovun oğlu Vüqar Səfərovun idarə etdiyi “Hyundai Tucson” markalı avtomobili içkili halda, yüksək sürətlə idarə etdiyi üçün idarəetməni itirərək “Lada 2107” markalı avtomobillə toqquşması və Ləzgiyev Ceyhun Novruz oğlunun dünyasını dəyişməsi ilə bağlı xəbərlər yayılsa da, İlyas Səfərov oğlunun belə maşını olmadığını iddia etmişdi.

İlyas Səfərov

Qubada bələdiyyə sədri olmuş Elxan Əliyevin oğlu Bəhram Əliyev idarə etdiyi “Mersedes” markalı avtomobillə 45 yaşlı sakin İmran Vaqif oğlu Əliyevi vurmuş, piyada hadisə yerində dünyasını dəyişmişdi.

Ötən ilin may ayında Xarici İşlər Nazirliyinin Turizm şöbəsinin rəisi Nurpaşa Abdullayevin oğlu Nicat Abdullayev avtoxuliqanlığa görə həbs edilib. 20-yə yaxın yol polisini arxasınca aparan gəncin içkili olduğu məlum olub.

Nicat Abdullayev

Səbail Rayon Dövlət Yol Polisi Şöbəsinin rəisi Cəmşid Hənifəyevin oğlu İdris Hənifəyevin idarə etdiyi “Galendewagen” markalı avtomobillə ABŞ səfirliyinə məxsus GMC markalı maşın toqquşmuş və səfirlik əməkdaşı yüngül xəsarət almışdı.

İlham Əsgərli

Nəsimi Rayon İcra Hakimiyyətinin (RİH) başçısı Asif Əsgərovun oğlu İlham Əsgərlinin törətdiyi ağır yol nəqliyyat hadisəsi hələ uzun müddət yaddaşlardan silinməyəcək. Çünki bu gəncin törətdiyi ağır qəza iki ailəni gözü yaşlı qoyub. Bir tərəfdə «Mc Donalds» Azərbaycanın rəhbəri Maqsud Mirzəyevin ailəsi, digər tərəfdə isə “Howo” markalı yük maşınının sürücüsü Əhliman Süleymanovun ailəsi. Xatırladaq ki, Maqsud Mirzəyevin oğlu Sənan Mirzəyevin ölümü ilə nəticələnən yol qəzası 2014-cü il sentyabrın 27-də Türkan-Zığ yolunda baş verib. Birlikdə təhsil alan və dost olan İlham Əsgərli ilə Sənan Mirzəyev həmin gün Şüvəlana “Paintball” oynamağa gediblər. İlham Əsgərlinin idarə etdiyi “Mercedes S500” markalı avtomobil yolda arxadan Əhliman Süleymanovun idarə etdiyi “Howo” markalı yük maşını ilə toqquşub. Nəticədə Sənan Mirzəyev dünyasını dəyişib, İlham Əsgərli, eləcə də hadisə zamanı maşında arxa oturacaqda olmuş sürücüsü Pərvin Fətullayev isə xəsarət alıb. Qeyd edək ki, hadisə ilə əlaqədar İlham Əsgərli ilə yanaşı, yük maşınının sürücüsü, Qəbələ rayonunun Karxana kənd sakini Əhliman Süleymanov da məsuliyyətə cəlb olunsa da, qısa müddətdən sonra icra başçısı Asif Əsgərov oğlunun azadlığa çıxamasına nail olmuşdu.

Bu siyahını uzatmaqla bitirmək mümkün deyil. Məmur balalarının törətdiyi qəzalara nəzər yetirsəniz hamısında bahalı avtomobil olduğunu görərsiniz. Bu avtomobillər haradandır, hansı qazancla əldə edilib onsuz da hamımız bilirik. Hətta prezident İlham Əliyev də dəfələrlə məmurlara öz övladlarının, ailə üzvlərinin hərkətəlrinə nəzarət etməyi tapşırıb, qanunları pozan məmur övladlarının cəzalandırmasını tələb edib. İndiyədək bir neçə məmurun övladı və qohumu cəzalandırılıb, özləri işdən çıxarılıb. Lakin görünür digərləri bundan nəticə çıxartmayıb…