Birləşmiş Əmirliklərin tanınmış din xadimi televiziya kanalında Suriya prezidenti Bəşər Əsəd və Suriya ordusu ilə bağlı mövqeyində 180 dərəcə dəyişiklik edib.

Reyting.az “Mehr”-ə istinadla xəbər verir ki, Şeyx Vasim Yusif Suriya böhranı ilə bağlı suala belə cavab verib: "Böhranın əvvəlində Əsəd və Suriya ordusunu günahlandırırdım. Cinayətkar qruplar olan “Cəbhət əl-Nusra” və “Əhrar əl-Şam”ı dəstəkləyirdim. Körfəz Əməkdaşlığı Şurasının “Əhrar əl-Şam”a dəstək olacağına ümid edirdim, amma bir müddət sonra onların dindən sapdığını gördüm”.

Şeyx Vasim əlavə edib: "Mən Əsədi dəstəkləmirdim, amma indi səhvimi etiraf edirəm. Əvvəllər “Cəbhət əl-Nusra” və ya “Əhrar əl-Şam” kimi qondarma islamçı qruplarla vuruşan bütün Suriya əsgərlərinə lənət yağdırırdım, amma indi buna təəssüflənirəm.

Hazırda Suriyada olsam, mütləq “Cəbhət əl-Nusra”ya qarşı vuruşacağam. Onlar din adı ilə Suriyanı məhv etdilər, qadınlara və uşaqlara təcavüz etdilər, dini ləkələdilər”.

Mütəxəssislər Şeyx Vasimin BƏƏ liderlərinə çox yaxın bir siyasi fiqur olduğunu bildirirlər. BƏƏ-nin bu yaxınlarda Dəməşqdə səfirliyini yenidən açdığını nəzərə alaraq, səlahiyyətlilərin Bəşər Əsəd və Suriyaya münasibətində dəyişiklik olduğu da söylənilir.