Kolorado ştatının Denver şəhəri yaxınlığındakı Evergreen Liseyində baş vermiş atışma nəticəsində iki şagird yaralanıb, atəş açan yeniyetmə isə həyatına qəsd edərək ölüb.
Ajans.az Associated Press-ə istinadən xəbər verir ki,hadisə çərşənbə günü saat 12:30 radələrində baş verib. Cefferson qraflığının şerif ofisinin sözçüsü Ceki Kelli bildirib ki, şagird məktəb binasının içərisində və xaricində tapançadan atəş açıb. Hadisədən sonra hüquq-mühafizə orqanları cəmi beş dəqiqə ərzində atıcını tapıb. Polis əməkdaşları atəş açmayıb.

Xəstəxanaya yerləşdirilən yaralılardan biri hələ də kritik vəziyyətdədir, digəri isə stabilləşib. Yaralıların yaşı açıqlanmayıb.

Evergreen Liseyi 900-dən çox şagirdə təhsil verir və meşəlik ərazidə yerləşir. Atışmadan sonra valideynlər yaxınlıqdakı ibtidai məktəbin qarşısında övladlarını gözləyiblər.

Valideynlərdən biri, Wendy Nueman, hadisə zamanı qızına çata bilmədiyini bildirib: “O, nəhayət borc telefonla zəng etdi, sadəcə ‘yaxşıyam’ dedi. Danışmaqda çətinlik çəkirdi,” – deyə göz yaşları ilə qeyd edib.

Hadisə zamanı məktəbdən qaçan bir qrup şagird yaxınlıqdakı evlərdən birinə sığınıb. Ev sahibi, təqaüdçü müəllim Don Sayqan bildirib ki, o və həyat yoldaşı şagirdlərə sığınacaq verib və valideynlərlə əlaqə qurmağa kömək ediblər.

Hazırda hadisə ilə bağlı araşdırma aparılır. Bu, 1999-cu ildə Koloradodakı Columbine Liseyində baş verən faciədən sonra bölgədə təhsil müəssisələrində yaşanan daha bir silahlı insidentdir.