Bağdasarov Paşinyanı yıxıb-sürüdü:
Ermənistanın Baş naziri Nikol Paşinyanın parlamentdəki çıxışında konstruktiv təkliflər əvəzinə yenə boş sözlər və qəhrəmanlığa çağırış yer alıb.

KONKRET.az xəbər verir ki, bunu Orta Şərq və Orta Asiya Araşdırmaları Mərkəzinin direktoru Semyon Bağdasarov oktyabrın 27-də telegram kanalında deyib.

“Baş nazir Paşinyanın çıxışını dinlədikdən sonra ürəkdən təəccübləndim – boş sözlər və qəhrəmanlığa çağırış. Lider bu gün həqiqətən nələr ediləcəyi ilə bağlı dəqiq təlimat verməlidir” deyə ekspert bu gün respublikanın həll edəcəyi vəzifələrdən danışıb.

“Ermənistana həm hərbi əməliyyatlara, həm də sənayenin müharibə şəraitinə keçməsinə rəhbərlik edə bilən konstruktiv və peşəkar bir hökumət rəhbərlik etməlidir” deyə Bağdasarov ilk görüləcək işdən söz açıb.

Dövlətin başında tapşırıqları yerinə yetirməyə qadir olan güclü şəxslərin rəhbərlik edəcəyi Milli Qurtuluş Komitəsi olmalıdır.

“Vəziyyəti düzəltmək üçün, peşəkarlar ölkənin başında olmalıdırlar. Təəssüf ki, cənab Paşinyan peşəkar deyil. O, ətrafına çox sayda tərəfdar toplaya bilən bir populistdir və başqa bir şeyə qadir deyil”, – deyə ekspert qeyd edib.

İkinci vəzifə olaraq, o, Ermənistan hakimiyyətini “NATO qərargahı ətrafında mənasız gəzmələrini dayandırmağa” çağırıb:

“Kollektiv şəkildə Qərbdən” kömək üçün müraciət etməyi dayandırmaq lazımdır. ABŞ da daxil olmaqla NATO ölkələrinin heç vaxt Türkiyənin maraqlarına zidd hərəkət etməyəcəyi açıqdır. NATO üçün Türkiyə nizə ucunu Rusiyaya qarşı yönəldən ən vacib müttəfiqdir”.

Eyni zamanda vurğulayıb ki, oktyabrın 29-da Bakıda Türkdilli Dövlətlərin Sammitində demək olar ki, bütün Orta Asiya dövlətlərini əhatə edəcək “Böyük Turan” Ordusunun yaradılması barədə qərar elan edilsə, bu sadəcə həyəcanverici bir siqnal olmayacaq.

“Bu, həm Ermənistan, həm də Rusiya üçün son dərəcə təhlükəli olan yeni bir siyasi qüvvənin yaradılmasıdır”, – deyən Bağdasarov Ermənistanın Rusiyasız belə bir mühitə tab gətirə bilməyəcəyini bildirib.

Ekspert Ermənistan hakimiyyətini hərbi səviyyədə texniki və hərbi-siyasi yardım göstərmək üçün ən qısa zamanda rəsmi şəkildə Rusiya rəhbərliyinə müraciət etməyə çağırıb:

“Rus əsgərlərini çağırmaqdan söhbət gedə bilməz! Söhbət hərbi-texniki yardımın artırılması ilə yanaşı, Ermənistanın hərbi hissələrinə müxtəlif infrastruktur problemlərinin həllində güclü dəstək verilməsindən gedir”.

Bundan əlavə, Bağdasarov Ermənistan ordusunun yenidən təchiz edilməsinə və müvafiq fondun yaradılmasına ehtiyac olduğunu qeyd edib.

“Ermənistan ordusunun yenidən təchizatı üçün 500 milyondan 1 milyard dollara qədər pul lazımdır. Ermənistan neft və qazla zəngin deyil, Ermənistan xalqı ilə zəngindir – kifayət qədər mənbəyə malik olan elitalara müraciət edin”, – deyə ekspert sonda populizmlə məşğul olmaq əvəzinə işləməyin vacibliyini bildirib.

Xatırladaq ki, 27 oktyabrda Ermənistanın Baş naziri Nikol Paşinyan respublika parlamentinin təcili iclasında çıxış edib. Fakt budur ki, Dağlıq Qarabağda hərbi əməliyyatlar bir aydır ki, davam edir. 26 oktyabrda Qarabağ münaqişəsi zonasında humanitar atəşkəs təşəbbüsünün üçüncü cəhdinin uğursuzluğundan sonra Qarabağdakı hərbi əməliyyatlar səngimir, Azərbaycan işğalda olan torpaqlarını geri qaytarır.