ABŞ-ın demokratik dövlət olmasına heç kim şübhə etmir. Bu ölkə həm də demokratiyanın təbliğatında və demokratik prinsiplərin həyata keçməsi istiqamətindəki fəaliyyətində lider sayılır. Elə Donald Trampın prezident seçilməsi də ABŞ demokratiyasının məhsuludur. Şəxsi həyatına toxunmadan demək olar ki, onun prezident olması gözlənilməz olub. Adətən, ABŞ-ın və başqa demokratik dövlətlərin siyasi həyatında daha fəal rol oynayanlar ölkəni idarə ediblər. Bu ölkənin həyatında baş verən ciddi hadisələr dünyaya təsir edə bilir. Çünki ABŞ təkqütblü dünyanın hələ də lideridir. Bunun da başlıca səbəbi iqtisadi-maliyyə məsələləridir. Dünyanın maliyyə bazarında dolların ağalığı, bazarda neftin qiymətinin müəyyənləşməsində Birləşmiş Ştatların həlledici rolu və başqa məsələlərdə tutduğu mövqe ABŞ-da baş verənləri dəyərləndirməyi vacib edir.

Əslində Donald Tramp 2016-cı ildə rəqibi Hillari Klntona qalib gəldiyi kimi, Cozef Baydenə də elə məğlub oldu. Ancaq keçmiş dövlət katibi Tramp kimi cığallıq etmədi. Yaxud 2000-ci ildə keçirilən prezident seçkisində kiçik Corc Buşun Demokratlar Partiyasından olan namizəd, Bill Klintonun prezidentliyi dövründə vitse-prezident işləmiş Albert Qor üzərində qələbəsi də qalmaqala səbəb olmuşdu. Onda da Seçilmişlər Kollegiyasının səsi problem yaratmışdı. Ancaq Demokratlar Partiyasından olan bu iki namizədin tərəfdarları Ağ evə hücum çəkmədi. Belə ehtimal etmək olar ki, bu işdə ABŞ-dakı demokratiyaya arxalanıb Donald Trampın prezident olmasına dəstək verənlər, onun zəifliyindən yararlanaraq ölkədə qiyamı reallaşdırmağa cəhd ediblər. Nəticədə biri polis əməkdaşı olmaqla ABŞ-ın 5 vətəndaşı yanvarın 6-da Kapitoliyə hücumun qurbanı olub. Federal Təhqiqat Bürosu hadisə ilə bağlı 160-dan artıq cinayət işi başlayıb. ABŞ-ın vitse-prezidenti Maykl Pens bildirib ki, Kapitoliyə hücum yolverilməzidir, bunda iştirak edənlər qanunun bütün ciddiyyəti ilə cəzalandırılacaqlar. O, yanvarın 6-da baş verənlərlə bağlı tvitter səhifəsində yazıb: “Bu gün Birləşmiş Ştatların Kapitolisinin qara günü idi.. Kapitolimizdə xaos düzəldənlər qalib gəlmədi. Zorakılıq həmişə uduzacaq, Azadlıq qalib gələcək...”