ABŞ-ın Federal Təhqiqatlar Bürosu (FTB) paytaxt Vaşinqtonda bir həftə əvvəlki qarışıqlıqların 100-dən çox iştirakçısını həbs edib və 200-dən çox potensial qanun pozucusunu müəyyənləşdirib.

“Report” xarici mətbuata istinadən xəbər verir ki, bu barədə FTB-nin rəhbəri Kristofer Rey bildirib.

"Biz və partnyorlarımız ötən həftə cinayətkar fəaliyyətdə - Kapitolinin mühasirəsində iştirak etmiş 100-dən çox insanı həbs etdik”.

O, qeyd edib ki, bununla bağlı təhqiqat davam edir.

FTB rəhbəri bildirib ki, buna oxşar hadisələri törətmək istəyənləri qəti şəkildə xəbərdar etmək istəyir.

"Yanvarın 6-dan artıq 200-dən çox insanı müəyyən etdik. Biz bilirik, siz kimsiniz. Əgər orada olsanız, onda FTB agentləri sizi tapacaqlar", - Rey xəbərdarlıq edib.

Yanvarın 6-da ABŞ prezidenti Donald Trampın tərəfdarları Vaşinqtonda Trampın mitinqindən sonra Kapitoliyə hücum ediblər. Nəticədə Konqresin işi bir neçə saatlıq dayanıb. Qarışıqlıqlar nəticəsində beş nəfər həlak olub, daha bir neçə nəfər xəsarət alıb.