Fransanın şimal-qərbindəki Rannes şəhərində Azərbaycandan gedən mühacirləri qeyri-leqal çalışdıran və onların hesabına milyonlarla avro qazanan mütəşəkkil qruplaşmaya qarşı əməliyyat keçirilib.

Teref.az-ın verdiyi xəbərə görə, bununla bağlı virtualaz.org “Euronews”a istinadən yazır ki, 12 nəfərlik qruplaşmanın 3 üzvü barəsində həbs qətimkan tədbiri çıxarılıb, qalanları polis nəzarətinə verilib.

Prokurorluq bildirir ki, həmin qruplaşma üzvləri saxta şirkətlər yaradaraq çirkli pulların yuyulmasını həyata keçirib. Qruplaşmaya daxil olan, Nantes şəhərində yaşayan Türkiyə vətəndaşı isə Azərbaycan və Türkiyədən saxta sənədlərlə qeyri-leqal mühacirlərin Fransaya aparılmasını, orada qanunsuz yollarla işlətdiyi və onlara qalmağa yer təşkil etdiyi bildirilir.

Şübhəlilər 2018-ci ildən bu yana 4 fərqli şirkət üzərindən bu fəaliyyətləri həyata keçiriblər. Onlar 2018-2021-ci illərdə 4 milyon avrodan çox vəsaiti əsasən Türkiyədəki bank hesablarına ötürüblər. Bundan bir neçə gün əvvəl Fransa polisi ölkənin şimal bölgələrində əsasən tikintilərdə işləyən bir qrup qeyri-leqal mühaciri saxlamışdı.