Parisdə pensiya islahatlarına qarşı nümayişlərdə polis gözyaşardıcı qazdan istifadə edib.

Publika.az "RİA Novosti"-yə istinadla xəbər verir ki, Parisdə pensiya yaşının artırılmasına qarşı mübarizə aparan "qara blok" radikalları kafe və mağazaların şüşələrini sındırıb, zibil qutularını yandırıb, reklam lövhələrini sındırıb, polisə fişənglər və şüşə butulkalar atıblar.

Buna cavab olaraq polis etirazçıları dağıtmaq üçün gözyaşardıcı qazdan istifadə edib. Bir çox etirazçı həbs olunub.

Qeyd edək ki, Parisdə pensiya islahatına qarşı üçüncü irimiqyaslı etiraz aksiyası keçirilir. “Ümumi Əmək Konfederasiyası” (CGT) həmkarlar ittifaqının məlumatına görə, aksiyada 400 min nəfər iştirak edir.

Bir gün əvvəl daxili işlər naziri Gerald Darmanin demişdi ki, pensiya islahatına qarşı nümayişlərdə asayişi 11 000 polis nəzarət edəcək, onlardan 4 000-i Fransa paytaxtındadır.

Xatırladaq ki, Fransanın baş naziri Elizabet Born yanvarın 10-da hökumətin 2023-cü ildə qəbul etməyi planlaşdırdığı mübahisəli pensiya islahatının layihəsini təqdim edib. Onun sözlərinə görə, hakimiyyət 2023-cü il sentyabrın 1-dən ölkədə pensiya yaşını ildə üç ay artırmağa başlayacaq. Beləliklə, 2030-cu ilə qədər pensiya yaşı 64-ə çatacaq.