Bütün dünyada məşhur olan tibbi ekspertiza üzrə həkim-mütəxəssis Bennet Omalu ABŞ-ın Demokratlar Partiyasından ölkə prezidentliyinə namizəd Hillari Klintonun zəhərləndiyini ehtimal edir.

SalamNews-un “Sputnik”ə istinadən verdiyi xəbərə görə, ABŞ-da futbolçuların baş beyninin degenerativ xəstəliyinin çoxsaylı beyin silkələnmələrinin nəticəsi olduğunü subut edərək məşhurlaşan Omalu bildirib ki, Klintonun qanı testdən keçməlidir.

O, özünün “Twitter” hesabında bu barədə yazıb: "Klintonun seçki kampaniyasını icra edənlərə onun qanında toksikoloji analiz aparmağı tövsiyə etmək məcburiyyətindəyəm. Güman edirəm ki, o zəhərlənib. Rusiya prezidenti Vladimir Putin və respublikaçıların prezidentliyə namizədi Donald Trampa etibar etmirəm. Onlardan hər şey gözləmək olar."

Xəbər verdiyimiz kimi, 2001-ci il 11 sentyabr terror aktı qurbanlarının xatirəsinə Nyu-Yorkda keçirilən mərasim zamanı H.Klintonun vəziyyəti qəfildən pisləşib. O, özünü nasaz hiss etdiyi üçün tədbiri vaxtından əvvəl tərk edib.

KİV prezidentliyə namizədin huşunu itirdiyi barədə məlumat yayıb.