Almaniyanın "Bosch" konserni Avropa avtomobil sənayesindəki böhran və sürücülərə kömək sistemlərinə, eləcə də avtonom idarəetmə üçün proqram həllərinə olan tələbatın azalması səbəbindən 5,5 min iş yerini ixtisara salacağını açıqlayıb.
İqtisadiyyat.az xəbər verir ki, bu barədə "Reuters" agentliyi məlumat yayıb.

"Bosch"un bəyanatına əsasən:

3,5 min iş yeri 2027-ci ilin sonuna qədər şirkətin kompüter texnologiyaları ilə bağlı bölməsində ixtisara salınacaq.
600 işçi 2026-cı ilin sonuna qədər Hildeşhaym şəhərindəki müəssisədən uzaqlaşdırılacaq.
1,3 min işçi isə 2027–2030-cu illər arasında Ştutqart yaxınlığında sükan idarəetmə elementləri istehsalı ilə məşğul olan zavoddan ixtisara düşəcək.
Alman avtomobil sektoru hazırda Çin istehsalçılarının daha ucuz məhsulları ilə rəqabət və zəif tələb şəraiti ilə qarşı-qarşıyadır. Bu, "Bosch" kimi nəhəng şirkətlər üçün də işçi azaldılmasını qaçılmaz edir.

Digər tərəfdən, yerli avtomobil sənayesini dəstəkləmək üçün müəyyən təşəbbüslər irəli sürülsə də sektorun gələcəkdə hansı istiqamət alacağı hələlik qeyri-müəyyəndir.