Prezident Donald Trampın ABŞ-ın BMT-dəki səfiri vəzifəsinə namizədi olan Nümayəndələr Palatası üzvü Eliz Stefanik çərşənbə axşamı Senatda təsdiqləmə dinləmələrində suallarla üzləşib. O, beynəlxalq qurumda Trampın “Öncə Amerika” gündəmini irəli sürəcəyini deyib. Amerikanın Səsinin Konqres müxbiri Katerin Gipson ətraflı məlumat verir.

ABŞ-ı Birləşmiş Millətlər Təşkilatında təmsil etmək üçün prezident Donald Trampın seçdiyi namizəd Eliz Stefanik çərşənbə axşamı hesabatlılıq çağırışı edib.

“BMT bu təməl missiyasını yerinə yetirmədi və biz daha yaxşısını tələb etməliyik. Mən Prezident Trampın BMT-də “Öncə Amerika”, güc vasitəsilə sülh prinsipi ətrafında islahatlar aparmaq və onun bütün dünyada sülh və təhlükəsizliyi təşviq etmək kimi fundamental missiyasına qayıtmaq baxışını bölüşürəm”, Eliz Stefanik bildirib.

Stefanik 2014-cü ildə 30 yaşında Konqresə seçilib və daha sonra Nümayəndələr Palatasının dördüncü yüksək rütbəli üzvü olub. Respublikaçı senatorlar hesab edirlər ki, Stefanikin dəmir intizamı və iti ağlı onu Birləşmiş Millətlər Təşkilatında ABŞ-ı müdafiə etmək üçün uyğun insan edir.

“Bizim bir çoxumuz BMT-yə, sülh, azadlıq və insan ləyaqəti dəyərlərini inkişaf etdirmək məqsədi daşıyan bu quruma baxanda orada Amerika dəyərlərinin əks olunduğunu görmürük. Biz dünyanın yeganə yəhudi dövlətinə qarşı geniş yayılmış antisemitizm görürük, çünki o, bütün istiqamətlərdən hücumlarla üzləşir. Biz zülmün və aqressiv avtokratların bayram edildiyini və rəhbər vəzifələrə yüksəldildiyini görürük”, Respublikaçı Senator Şelli Mur Kapito deyib.

Stefanik senatorlara Konqresdəki dönəminin səfir kimi yanaşmasına dair məlumat verəcəyini deyib.

“ABŞ indiyə qədər BMT-yə ən böyük töhfə verən ölkədir. Bizim vergi dollarlarımız Amerikanın maraqlarına zidd, antisemitizmə meylli və ya dələduzluq, korrupsiya və ya terrorizmlə məşğul olan qurumların dəstəklənməsinə ortaq olmamalıdır. Biz milli təhlükəsizliyimizi gücləndirən və BMT proqramlarının effektivliyini artırmaq üçün nəticələr verən proqramlara sərmayə qoymalıyıq”, o qeyd edib.

Senatın Xarici Əlaqələr Komitəsindəki əsas respublikaçı Senator Cim Riş bununla razıdır.

"Hesab edirəm ki, hər bir BMT agentliyini onların etdiklərinin Amerika üçün birbaşa faydalı olub-olmadığını müəyyən etmək üçün qiymətləndirmək və cavab "hə" olana qədər onları məsuliyyətə cəlb etmək məqsədəuyğundur", o deyib.

Çərşənbə axşamı BMT-nin sözçüsü Farhan Haq bu iddianı təkzib edib.

“Birləşmiş Ştatların BMT-nin müntəzəm büdcəsinə 1,5 milyard dollar borcu var - 1,5 milyard. Müntəzəm büdcədən başqa, sülhməramlı büdcə və tribunallar var - onların hər üçünə borclu olduqları ümumi məbləğ 2,8 milyard dollardır”, Farhan Haq deyib.

Bir analitik Amerikanın Səsinə bildirib ki, ABŞ üçün 80 illik təşkilatı dəyişmək çətin ola bilər.

“Bəzi aşağı institutlarda biz Birləşmiş Millətlər Təşkilatının ən böyük donoruyuq. Beləliklə, bu rıçaqdan bir qədər istifadə etmək imkanı var. Amma adətən, biz bu institusional dəyişikliklər üzərində bu rıçaqdan yalnız kiçik üsullarla istifadə edə bilmişik”, Amerika Biznes İnstitutundan Con Fortye bildirib.

Demokratlar isə Stefanikin keçmiş hərəkətlərindən narahatdırlar.

"Siz Birləşmiş Millətlər Təşkilatının və onun ixtisaslaşmış qurumlarının maliyyələşdirilməsinin dayandırılmasına səs verdiniz. Əlbəttə, mən razıyam ki, Birləşmiş Millətlər qeyri-mükəmməl qurumdur, lakin BMT həm də Amerika vergi ödəyicilərinin pullarının gücünü gücləndirir. ABŞ-ın aradan götürülməsi düşmənlərimizin, xüsusən də Rusiya və Çinin istəyidir”, Demokrat senator Cin Şahin bildirib.

Əgər təsdiqlənsə, Stefanik Birləşmiş Millətlər Təşkilatındakı ABŞ missiyasına rəhbərlik edən 32-ci şəxs olacaq.