Fransa, dondurulmuş Rusiya aktivlərindən əldə edilən faizlər hesabına Ukraynaya 211 milyon dollardan çox dəyərində yeni hərbi yardım paketi hazırlayır, müdafiə naziri bazar günü dərc olunmuş müsahibəsində bildirib.

Prezident Emmanuel Makronun yaxın müttəfiqi olan Sebastyan Lekornu, "Tribune Dimanche" qəzetinə verdiyi müsahibədə ABŞ-ın Ukraynaya silah tədarükünü dayandırmasını Kyivin Rusiyanın hərbi müdaxiləsinə qarşı mübarizəsi üçün "ağır zərbə" adlandırıb.

"Bu il biz dondurulmuş Rusiya aktivlərindən əldə edilən faizlər hesabına 195 milyon avro (211,253,250 dollar) məbləğində yeni paketi səfərbər edəcəyik," o deyib.

Bu paket çərçivəsində 155 millimetrlik mərmilər və Parisin Ukraynaya göndərdiyi "Mirage 2000" qırıcı təyyarələri üçün nəzərdə tutulmuş AASM hava-yer silahlarının tədarükü mümkün olacaq.

Lekornu, Fransa hökumətinin dondurulmuş Rusiya aktivlərinin özlərini Ukraynaya kömək üçün istifadə etməyi nəzərdən keçirib-keçirməyəcəyi barədə şərh verməyib. Belə bir addım müttəfiqi Böyük Britaniya tərəfindən dəstəklənsə də, Paris bu mövzuda ehtiyatlı mövqe sərgiləyir.

Ancaq Lekornu döyüş meydanından kənarda Rusiyanın"demokratiyamızı və iqtisadiyyatımızı" hədəf alaraq "müharibəni yenidən ixtira etdiyini" və bunun "onların böyük gücü" olduğu barədə xəbərdarlıq edib.

O, Fransanın 2027-ci ildə keçiriləcək növbəti prezident seçkilərinin "Rumıniyada olduğu kimi genişmiqyaslı manipulyasiyalara məruz qala biləcəyini" deyib. Belə ki, Rumıniyada ilk turda ultra-sağçı namizəd lider olub, lakin nəticələr Konstitusiya Məhkəməsi tərəfindən ləğv edilib.

O, Donald Trampın ABŞ prezidenti seçilməsindən sonra Vaşinqtonun Ukrayna siyasətində baş verən dəyişikliklərə baxmayaraq, transatlantik münasibətlərdə ciddi bir qırılmanın olmadığını vurğulayıb: "Mən hələ də onları müttəfiq hesab edirəm, baxmayaraq ki, onların böyük qeyri-müəyyənliyi var."

ABŞ-ın Ukraynaya silah tədarükünü dayandırmasının "ağır zərbə" olduğunu vurğulayan Lekornu, Ukraynanın "bir müddət dözə biləcəyini, lakin bu fasilənin uzun sürməməli olduğunu" bildirib.

Lekornu Fransanın kəşfiyyat məlumatlarına əsasən, Rusiyanın növbəti beş ildə NATO üzvünə hücum etməyi planlaşdırdığına dair heç bir göstərişin olmadığını qeyd edib. Lakin o, "Dnestryanı bölgə vasitəsilə Moldovada sabitliyi pozmağa meylin olduğunu" deyib.

ABŞ-ın yardımı dayandırdığı bir dövrdə, Makron və başqalarının Avropa İttifaqı ölkələrini müdafiə xərclərini artırmağa çağırdıqları bir vaxtda, Lekornu gələcək illərdə Fransa ordusu üçün prioritet məsələlərinin sursat və elektron müharibə olacağını bildirib.

"İkinci prioritet orduların dronlaşdırılması və robotlaşdırılmasıdır," o əlavə edib və süni intellektin və kosmosun rolunu da vurğulayıb.