ABŞ Beynəlxalq İnkişaf Agentliyinin (USAID) bütün əməkdaşları sentyabrın 30-dək işdən çıxarılacaq.

Bu barədə ABŞ Konqresindəki mənbələrinə istinadən "Reuters" agentliyi məlumat yayıb.

Qeyd olunur ki, USAID-in xaricdəki bütün nümayəndəlikləri 2025-ci maliyyə ilində, yəni sentyabrın 30-dək bağlanacaq.

ABŞ dövlət katibi Marko Rubio agentliyin yenidən təşkili ilə bağlı elan edib ki, iyulun 1-dək USAID-in bəzi funksiyaları Dövlət Departamentinə veriləcək və administrasiyanın prioritetlərinə uyğun gəlməyən digər funksiyalar dayandırılacaq.

Qeyd edək ki, fevralın əvvəlində ABŞ Prezidenti Donald Tramp beynəlxalq təşkilatların maliyyələşdirilməsinə xeyli miqdarda vəsait ayıran USAID-in fəaliyyətini dayandırıb. Daha sonra ABŞ administrasiyası agentlik və Dövlət Departamentinin xarici yardım müqavilələrinin 92%-ni ləğv etmək niyyətində olduğunu bəyan edib. Bu da dövlət büdcəsinə təxminən 60 milyard dollar qənaət etməyə imkan verib.

Martın 10-da əvvəllər USAID-in müvəqqəti rəhbəri təyin edilən Rubio, altı həftəlik araşdırmadan sonra ABŞ hökumətinin agentliyin proqramlarının 83%-ni rəsmi olaraq dayandırdığını bildirib.

Onun sözlərinə görə, ləğv edilmiş 5.2 min müqavilə çərçivəsində onmilyardlarla dollar ABŞ-nin maraqlarına deyil, bəzi hallarda onun ziyanına xərclənib.