"Nömrə 1A" adlı əsərin sirri 77 ildən sonra məlum olub. Rəsm 1948-ci ildə abstrakt ekspressionist Cekson Pollok tərəfindən çəkilib və rəssamın klassik üslubunu əks etdirir. Əsərdə canlı, çoxrəngli kətan yaratmaq üçün boya səpilir. Pollok hətta rəsmin yuxarı hissəsinə əl izlərini əlavə edərək ona fərdi toxunuş verib. Lakin istifadə edilən mavi piqmentin mənşəyi uzun müddət naməlum qalıb. Uzun onilliklər davam edən araşdırmalardan sonra bu sirr açılıb.

Bu barədə "The Guardian" xəbər verir.

Araşdırmada lazer texnologiyası ilə boya molekullarının strukturu analiz olunub və mavi rəngin unikal kimyəvi "barmaq izi" aşkarlanıb. Bu üsul, həmçinin Pollokun digər rənglərdə istifadə etdiyi piqmentlərin də tədqiqinə imkan verir.

Tədqiqat göstərib ki, Pollok "manqan mavi" adlı sintetik piqmentdən istifadə edib.

Qeyd olunur ki, bu rəng əvvəllər rəssamlar tərəfindən istifadə olunsa da, 1990-cı illərdə ekoloji səbəblərdən istifadəsi dayandırılıb. Alimlər bu kəşfi həm əsərlərin bərpası, həm də saxtakarlığın aşkarlanması üçün önəmli hesab edirlər.