Niderland F-16 qırıcılarının son partiyasını Ukraynaya göndərib. “Report” xəbər verir ki, bu barədə Krallığın Müdafiə Nazirliyinin Mətbuat xidməti məlumat yayıb.

Qeyd olunur ki, təyyarələr Şimali Brabant əyalətindəki Volkel aviabazasından çıxıb və onların Ukraynaya verilməsi üçün hazırlıqların aparılacağı Belçikaya uçub. Krallığın Müdafiə Nazirliyinin rəhbəri Ruben Brekelmans F-16-ların göndərilməsində iştirak edib.

"Ancaq indi biz F-35-ə keçidlə vidalaşarkən, mən Ukraynadan daha yaxşı yer təsəvvür edə bilməzdim. Rusiyanın gündəlik hava hücumlarına görə, F-16-lar Ukrayna üçün həyati əhəmiyyət kəsb edir. Bu, onlara və bizə Rusiyanın təcavüzünün qarşısını almağa imkan verir", - nazir deyib.

O bildirib ki, dinc dövrdə bu qırıcılara təlimə illərlə tələb olunur, lakin ukraynalı pilotlar və texniklər bu təyyarələri “rekord müddətdə” mənimsəyə biliblər.

Müdafiə Nazirliyi Niderlandın Ukraynaya ümumilikdə 24 qırıcı göndərdiyini qeyd edib. Onlar həmçinin F-16-ya xidmət üçün lazım olan hər şeyi - ehtiyat hissələri, döyüş sursatı və yanacaqla təmin etməyə davam edəcəklər.