Ukrayna hökuməti ABŞ-dən mayeləşdirilmiş təbii qazın (MTQ) idxalı üçün yeni nəqliyyat marşrutu müəyyən edib.
Bu barədə "RBK Ukrayna" məlumat yayıb.

Məlumatda bildirilir ki, ilk qaz tədarükləri iyun ayında başlaya bilər. Əgər tədarüklər oktyabrdan sonra da davam edərsə, Ukrayna ilin sonuna qədər 700–800 milyon kubmetrədək ABŞ MTQ-si ala bilər.

Qaz Yunanıstandan Rumıniya, Bolqarıstan və Moldova üzərindən Ukraynaya revers (əks istiqamətli) axınla çatdırılacaq. Bu marşrut Kiyevə gündəlik təxminən 3 milyon kubmetr qaz əldə etməyə imkan verəcək.

Buna qədər "Reuters" agentliyi mənbələrə istinadla yazmışdı ki, Rusiya və ABŞ Avropaya Rusiya qazının tədarükünün bərpası məsələsini müzakirə edirlər. Məlumatda qeyd olunur ki, ABŞ Prezidenti Donald Tramp Ukraynada sülhə nail olmaq istəyir və bu da qaz sahəsində münasibətlərin istiləşməsi ehtimalını artırır.

Eyni zamanda, ABŞ-nin bu prosesdə iştirakı Vaşinqtona Avropaya gedən Rusiya qazının həcmini görmək və bəlkə də nəzarət etmək imkanı verəcək.