Yaponiya və ABŞ Şimali Koreyaya qarşı növbəti sanksiyalar tətbiq etməyi, o cümlədən bu ölkəyə neft ixracına qadağa qoymağı planlaşdırırlar.

Axar.az xəbər verir ki, avqustun 29-da BMT Təhlükəsizlik Şurası Şimali Koreyanın Yaponiya üzərindən keçərək Sakit Okeana düşən ballistik raket sınağı ilə əlaqədar sədrin bəyanatını yayıb. Təhlükəsizlik Şurası Şimali Koreyadan belə təxribatçı hərəkətləri dayandırmağı tələb edib.

Yaponiyanın BMT-dəki daimi nümayəndəsi Koro Beşşyo Pxenyana qarşı yeni sanksiyalar tətbiq etməyə çağırıb. Jurnalistlərin Şimali Koreyaya qarşı neft embarqosunun tətbiqi barədə sualını cavablandıran K.Beşşyo bildirib ki, bu, mümkün variantlardan biridir.

ABŞ da Pxenyana qarşı neft embarqosunun tətbiqi təklifi ilə çıxış edib. Lakin bu addımın Şimali Koreya əhalisinin həyatına ciddi təhlükə yaradacağını bildirən Çin, bunun əleyhinə çıxış edib.