Braziliyada Rio de Janeyro Bələdiyyə məclisinin qadın üzvü və İnsan Haqları müdafiəçisi Marielle Franko sui-qəsd nəticəsində qətlə yetirilib.

Publika.az xəbər verir ki, Frankonun maşını silahlı hücuma məruz qalıb.

Polis orqanları sui-qəsd zamanı 38 yaşlı xanım Frankonun başına 4 güllə dəydiyini açıqlayıb. Eyni zamanda onun sürücüsü də sui-qəsdin qurbanı olub.

Yerli müdafiə naziri Raul Yunqmann sui-qəsdlə bağlı federal polisin də istintaqa kömək edəcəyini söyləyib.

Frankonun öldürülməsindən sonra Rioda minlərlə insan küçələrə axışaraq etiraz aksiyası keçirib.

Qeyd edək ki, ötən həftəsonu Franko sosial şəbəkə hesabı vasitəsi ilə şəhərdəki polis şiddətini qınamışdı.