Mənzil İnşaatı Dövlət Agentliyi (MİDA) yeni onlayn satış elan edib. Agentliyin yaydığı məlumata görə, 29 iyul tarixdə 1200-dək mənzil onlayn satışa çıxarılacaq.

Azərbsycan İnternet Forumunun prezidenti Osman Gündüz bildirib ki, MİDA mənzillərin onlayn satışında şəffaflıq və ədalətli seçimlə bağlı ehtiyac olan, ictimai əhəmiyyət kəsb edən məlumatları paylaşmayıb.

Ekspert daha sonra Agentliyə suallar ünvanlayıb və gözləntilərini açıqlayıb:

"-Ötən müddət ərzində MİDA güzəştli mənzil informasiya sistemində hansı yenilikləri edib?

-Süni seçimlərin, robot seçimlərin, qeyri-qanuni müdaxilələrin qarşısını almaq üçün addımlar atılıbmı?

-Sistemin dayanıqlığı və təhlükəsizliyi ilə bağlı auditlər aparılıbmı, güvənli qurumların rəyləri varmı?

-Onlayn satış prosesi sosial mediada və TV-də canlı yayımlanacaqmı?

-İctimai nəzarət imkanları təşkil olunacaqmı?

Xatırlayıram ki, sonuncu satışda MİDA özü etməsə də canlı yayımı biz təşkil etmişdik.

Onlayn satış prosesi şəffaf, korrupsiya riski az olan sistem olmasına baxmayaraq, İT bacarıqlarla bağlı öncədən bəlli olan ədalətsizlik olduğundan alternativ güzəştli mənzil satışı üsulu ilə bağlı təkliflər hazırlanıbmı?"