Rusiya hərbçilərini Qarabağdan çıxarmaq istəyir, bəs sonra? – “İndi Moskva Paşinyana deyə bilər ki...”

7-10-2023, 10:34           
Rusiya hərbçilərini Qarabağdan çıxarmaq istəyir, bəs sonra? –
“Rusiya Müdafiə Nazirliyinin nümayəndə heyəti sülhməramlı qüvvələrinin Qarabağdan çıxarılmasının vaxtını müzakirə etmək üçün İrəvana gedəcək."

“AzPolitika.info” xəbər verir ki, bu barədə Rusiyanın dövlət agentliyi TASS diplomatik mənbəyə istinadən xəbər yayıb.

“Rusiya Müdafiə Nazirliyinin nümayəndə heyəti İrəvana səfər edəcək. Erməni tərəfi ilə görüşdə Rusiya sülhməramlı kontingentinin Dağlıq Qarabağdan çıxarılmasının konkret tarixləri müzakirə olunacaq”, - deyə agentliyin mənbəsi bildirib.

Bununla belə, rəsmi İrəvan Rusiya Müdafiə Nazirliyinin nümayəndə heyətinin Ermənistana səfəri barədə məlumatı olmadığını bildirir. Ermənistan Müdafiə Nazirliyinin mətbuat katibi Aram Torosyan yerli mətbuata bildirib ki, Ermənistan Müdafiə Nazirliyində belə bir görüşün keçirilməsi nəzərdə tutulmayıb.

Bir qədər sonra TASS hansısa diplomatik mənbəyə istinadla özünün daha əvvəlki məlumatını təkzib etdi.

Bununla belə, yaranmış hazırkı vəziyyətdə Rusiya sülhməramlılarının Qarabağda görəcəyi bir iş qalmayıb və onların Azərbaycan ərazisini tezliklə tərk edəcəkləri ehtimalı kifayət qədər qüvvətlidir.

Siyasi təhlilçi Şahin Cəfərli bu barədə məlumatları şərh edərkən bildirib ki, Rusiya Qarabağdan çıxmasını Ermənistanla o səbəbdən müzakirə etmək istəyə bilər ki, hərbçilərini Laçın yolu ilə ora aparsın: “Ermənistan vasitəsilə Rusiyaya qayıtmaq məntiqli görünmür, çünki bunu Azərbaycan ərazisi ilə daha asan həyata keçirmək olar. Məsələn, Xocalıdakı hava limanı normal vəziyyətdədirsə oraya, uyğun durumda deyilsə, Füzuli hava limanına hərbi nəqliyyat təyyarələri göndərməklə; yaxud Azərbaycanın avtomobil və dəmir yolları şəbəkəsi vasitəsilə çıxış əməliyyatını gerçəkləşdirmək mümkündür. Bakı buna şərait yaradar”.

Ekspert vurğulayıb ki, Rusiyanın Cənubi Qafqazı tərk etmək istəmədiyi də aydındır. “Moskvanın əsl niyyəti bu ola bilər ki, Ermənistanda hərbi mövcudiyyətini gücləndirsin və Qarabağdan çıxacağı halda, Ermənistan-Azərbaycan sərhəd xəttinə, yaxud Zəngəzura yerləşsin. Bilirsiniz ki, 10 noyabr Bəyanatında Zəngəzurdan keçəcək nəqliyyat kommunikasiyasına Rusiyanın nəzarət etməsi əksini tapıb. İndi Moskva Paşinyana deyə bilər ki, bu müddəanı xoşluqla reallaşdırmaq məsləhətdir, əks halda Azərbaycan və Türkiyə bunu zorla edəcək”, - o qeyd edib.

Nikol Paşinyan buna razı olarmı?

Ş.Cəfərli deyir ki, çətin görünür: “Üstəlik, son hadisələrdən sonra 10 noyabr Bəyanatı, faktiki, deaktiv oldu və ümumən Rusiya-Azərbaycan-Ermənistan üçtərəfli formatı problemlərin həllində mühüm platforma kimi sıradan çıxmasa belə, əvvəlki çəkisini itirdi.

Bütün bu detallar çox önəmli olmaqla bərabər, yayılan xəbərdə əsas məqam Rusiya hərbi kontingentinin Qarabağı - Azərbaycanı tərk etməsi ilə bağlı hissədir. Ermənistan MN Rusiya nümayəndə heyətinin səfəri barədə məlumatı təkzib etsə də, bəllidir ki, TASS adətən Rusiya rəsmi mənbələrinə istinadən xəbər yayır, yəni informasiyanın siyasi hissəsi böyük ehtimalla doğrudur”.












Teref.info © 2015
E-mail: n_alp@mail.ru            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.