Son zamanlar “Veysəloğlu Grup” MMC-nin sahibi, Azərbaycan biznes dünyasının ən müəmmalı şəxslərindən biri olan Aydın Talıbovun deputatlıq arzusuna düşməsi ilə bağlı xəbərlər tirajlanır və deyilənə görə də bu xəbərlər iş adamını çox narahat edir…

Əslində burda qeyri-adi bir şey də yoxdur. Çünki bütün həddi-buluğa çatmış ölkə vətəndaşları kimi, Aydın Talıbovun da parlamentdə təmsilçi olaraq çıxış etmək hüququ var və onun bu hüququ konstitutsiya ilə müdafiə olunur.

Amma yenə də vətəndaş Aydın Talıbovun iş adamı kimi fəaliyyətində bir sıra qeyri-adi hallar var. Onlardan birincisi ölkədə qida sektorunda monopolya sahiblərindən biri, mülkiyyətində istehsal zavodlarının, ölkə miqyasında 300-dən artıq supermarketlərin və marketlərin (bunlara “Araz”, “Oba”, “SPAR” marketlər şəbəkəsi daxildir), həmçinin “Ulduz” şokolad fabriki, Naxçıvanda “Sirab” mineral sular zavodlarının, “Favorit”, “Xonça”, “AVT Logistics” kimi xidmət və satış mərkəzləri, cürbəcür kafelərin sahibi və hətta KİA avtomobillərinin satış dileri olan Aydın Talıbovun şəxsi sərvəti haqqında məlumatların olmamasıdır.

Maraqlıdır “Veysəloğlu Grup” MMC hüquqi şəxsinə aid olan bütün bu sərvətlər tək Aydın Talıbova aiddirsə, onda onun adı niyə “Forbes”in siyahısında yoxdur? Çünki bütün bu sadalanan biznes strukturları ilə tək Aydın Talıbov “Forbes”in siyahısına düşməliydi. Onu da qeyd edək ki, tək Aydın Talıbov deyil, Azərbaycanda bir çox iş adamları “Forbes”in siyahısında yer almalıdırlar. Amma nə sirdisə, Azərbaycandan olan qeyri-məmur biznesmenlər belə, bu siyahıya düşmürlər. Bəlkə ona görə ki, onların biznesi heç də şəffaf deyil?

Əlbəttə ki, bu sual daha çox hökümətin müəyyən qurumlarına, xüsusən də vergi xidmətinə aiddir, onlar bu suala açıqlıq gətirməlidirlər. Amma yenə potensial bir seçici, ya da adi bir vətəndaş kimi Aydın Talıbovun sahib olduğu mal varlığı məni maraqlandırır. Xüsusən, “Veysəloğlu Grup” bütünlükdə Aydın Talıbovun şəxsi sərvətinə aid deyilsə, o zaman onun şəxsi sərvəti nələri əhatə edir və bu sərvət haqqında hardan məlumat almaq olar? Ən nəhayət Aydın Talıbovun şəxsi hesabına “Veysəloğlu Grup”dan hər il nə qədər qazanc daxil olur və Aydın Talıbov bu qazancdan hər il nə qədər vergi ödəyir?

Ümid edirik ki, deputat olaraq xalqın müəyyən hissəsinin təmsilçisi olmaq istəyən Aydın Talıbov bu suallara şəffaf bir şəkildə aydınlıq gətirəcək və onun biznes fəaliyyəti ilə bağlı uzun illərdir havadan asılı qalan çoxsaylı suallara cavab verəcək. Bu sadəcə bizim arzumuzdur…

Hələlik isə bu arzumuzu bir tərəfə qoyaraq Aydın Talıbovun “Araz” super marketlərdə vətəndaşın cibindən 3 qəpik artıq çıxarmaq naminə ortaya qoyduğu “tamah dişindən” danışacağıq.

Xatırladaq ki, 15 fevral 2023-cü ildən Ekologiya və Təbii Sərvətlər Nazirliyi tərəfindən ticarət şəbəkələrinə göndərilən məktub əsasında pərakəndə satış məntəqələri polietilen torbaları öz müştərilərinə pulla satırlar.

Öncədən qeyd edək ki, ETSN-nin bu qərarının ölkə ekologiyasına müsbət təsiri haqqında heç nə demək mümkün deyil, amma uydurma endirimlərlə alıcıya minnət qoyan və buna rəğmən yüksək qiymətlərlə malalrı istehlakçılara satan ticarət mıəntəqələri ETSN-nin bu qərarından normal qazanc əldə edirlər.

Hətta bu qazanc o qədər normaldır ki, Aydın Talıbov “Araz” super marketlərdə alıcını daha çox polietilen torbalar almağa məcbur edir. Məhz məcbur edir…

Xatırladaq ki, bir neçə aydır ki, “Araz” super marketlərdə tərəvəz və digər kənd təsərrüfatı mallarını yığmaq üçün alıcıya pulsuz təqdim edilən tutacaqlı polietilen torbaları ləğv edilib, onun yerinə isə tutacağı olmayan polietilen torbalar təqdim edilir. Bi isə alıcılara əlavə problemlər yaradır. Çünki tutacağı olmayan polietilen torbalar alıcılar üçün narahatlıq yaradır.

Burda isə məqsəd kassada alıcıya daha çox polietilen torbalar satmaqdır. Çünki bir çox halalrda alıcılar polietilen torbalara əlavə pul xərcləmək istəmirlər. Tutacağı olmayan polietilen torbalarla isə alıcı kassadan əlavə polietilen torbalar almağa məcbur olurlar. Yəni Aydın Talıbov bunu özü üçün əlavə gəlir yeri olaraq görür və ona görə vətəndaşdan əlavə 3 qəpik çıxarmaq da qənimətdir…

Xatırladaq ki, “Araz” super marketlərdən savayı başqa ticarət məntəqələrində belə hallar müşahidə olunmur.

Biz dəfələrlə “Araz” super marketlərində bununla bağlı alıcıların şikayətləri ilə üzləşmişik. Şikayətlərə isə bir qayda olaraq müdriyyətdən bildirirlər ki, onlara bu torbalar mərkəzləşdirilmiş şəkildə gəlir və bununla bağlı nəsə etmək onların səlahiyyətləri xaricindədir.

Qeyd edək ki, bir neçə həftə əvvəl , “Araz” super marketlərdə tutacağı olmayan polietilen torbalar yenidən tutacaqlı torbalarla əvəzləndi. Amma bu da uzun sürmədi. Ötən həftədən başlayaraq , “Araz” super marketlərdə yenə də müştərilərə tutacağı olmayan torbalar təqdim olunur…

Görünür ki, digər supermarketlərin sahiblərindən fərqli olaraq Aydın Talıbov üçün vətəndaşın cibindən əlavə 3 qəpik çıxarmaq önəmli məsələdr. Çünki atalar deyib ki, “dama-dama göl olar”…