Müharibə Tədqiqat İnstitutunun (ISW) analitiklərinin fikrincə, Rusiya Ukrayna ilə istənilən ədalətli danışıqlara getmək istəmədiyini nümayiş etdirməkdə davam edir. Onlar bu qənaəti Rusiya "diplomatiyası” və onun lideri Sergey Lavrovun yeni addımlarının nəticələrinə əsaslanaraq səsləndiriblər.

Qaynarinfo xəbər verir ki, bu barədə ISW-nin növbəti analitik yazısında deyilir.

Sentyabrın 9-da Rusiyanın xarici işlər naziri Sergey Lavrov Səudiyyə Ərəbistanına səfər edib və burada nazirlər səviyyəsində Rusiya-Körfəz Əməkdaşlıq Şurası formatında iclasda iştirak edib. Lavrovun bu görüşdə ehtimal olunan məqsədi Moskvanın arzuladığı "Avrasiya təhlükəsizlik arxitekturasını” yaratmaq üçün Kremlin səylərini davam etdirməkdir.

Lavrov Səudiyyə Ərəbistanının bir sıra hökumət və monarxiya nümayəndələri ilə danışıqlar aparıb və Rusiyanın Körfəz ölkələri ilə əməkdaşlığı gücləndirməkdə maraqlı olduğunu vurğulayıb. Həmçinin ticarət, mədəni əlaqələr və ikitərəfli investisiyaların gücləndirilməsi müzakirə olunub. Eyni zamanda, Lavrov Səudiyyə Ərəbistanının vəliəhdi və baş naziri Məhəmməd bin Salmanı 2024-cü ilin oktyabrında Rusiyanın Kazan şəhərində keçiriləcək BRİKS sammitinə dəvət edib.

ISW xatırladır ki, 2024-cü ilin iyulunda Lavrov Rusiya və Çinin Fars Körfəzi Ərəb Dövlətləri üzrə Əməkdaşlıq Şurası çərçivəsində Avrasiya təhlükəsizlik arxitekturasının yaradılmasının tərəfdarı olduqlarını bildirib. Buna görə də, çox güman ki, Lavrov Körfəz liderləri ilə görüşlərindən bu gündəmi irəli sürmək üçün istifadə edib, analitiklər deyirlər. ISW daha əvvəl qiymətləndirmişdi ki, Rusiyanın belə bir "təhlükəsizlik arxitekturasına” dair təklifi Rusiyanın "uzunmüddətli strateji məqsədi Qərbin birliyini pozmaq, NATO-nu parçalamaq və hazırkı dünya nizamını məhv etmək” ilə uzlaşır.

ISW ekspertləri həmçinin ehtimal edirlər ki, Kreml rəsmiləri Rusiyanın Ukraynaya qarşı müharibəsi ilə bağlı guya "beynəlxalq sülh vasitəçiliyi səyi” yaratmaq cəhdlərini nümayiş etdirirlər ki, bu da eyni zamanda Rusiyanın Ukrayna ilə ədalətli danışıqlarda iştirak etmək istəmədiyini nümayiş etdirir. Xüsusilə, Səudiyyə Ərəbistanında keçirilən görüş çərçivəsində Lavrov Braziliya və Hindistanın xarici işlər nazirləri ilə də görüşüb. Rusiya Xarici İşlər Nazirliyi Lavrovun guya onlarla Ukraynaya qarşı müharibəni müzakirə etdiyini, lakin detalları açıqlamadığını iddia edib.

ISW həmçinin xatırladır ki, Ukrayna rəsmiləri Rusiya nümayəndəsini Ukraynanın bu ilin sonunda təşkil etdiyi ikinci sülh sammitində iştirak etməyə açıq şəkildə dəvət ediblər.