Rusiya Prezidenti Vladimir Putin son vaxtlar Ukraynaya qarşı başladığı müharibənin dayandırılması ilə bağlı danışıqlara maraq göstərmirdi. Lakin indi o bəyan edib ki, Almaniya Kansleri Fridrix Mers ilə görüşməyə hazırdır. Eyni zamanda, Almaniyanın Ukraynaya “Taurus” raketləri tədarük etməsi məsələsində sərt xəbərdarlıq edib.
Putin, Sankt-Peterburq İqtisadi Forumu çərçivəsində Almaniya mətbuat agentliyi DPA-ya açıqlamasında deyib: “Əgər Mers zəng edib danışmaq istəsə, Rusiya bu cür əlaqələrə hər zaman açıqdır.”
Putin qeyd edib ki, Ukraynaya qarşı hərbi əməliyyatlar kontekstində Almaniyanı neytral ölkə saymır. “Almaniya Ukraynanın tərəfindədir, bu ölkəyə tanklar tədarük edir və beləliklə, münaqişəyə faktiki olaraq cəlb olunub.”
“Taurus” raketləri münasibətləri “tamamilə məhv edər”
Putin yenidən xəbərdarlıq edib ki, Almaniyanın Ukraynaya “Taurus” tipli uzaqmənzilli raketlər göndərməsi Rusiya ilə Almaniya arasındakı münasibətləri “tamamilə məhv edəcək” və eyni zamanda, Rusiya ordusunun Kiyevə qarşı hücumlarına “heç bir təsir göstərməyəcək.” Bundan əlavə, Almaniya beləliklə, münaqişənin birbaşa tərəfinə çevrilmiş olacaq.
Hazırda Rusiya ilə Almaniya arasında münasibətlər son dərəcə gərgindir. Rusiya, Ukraynaya silah göndərilməsindən narazıdır və xüsusilə Almaniya istehsalı olan “Taurus” raketlərinin Rusiya ərazisinə qarşı istifadə edilməsinin qarşısını almağa çalışır. Moskva, Ukraynaya dəstək verdiyinə görə Almaniyanı düşmən ölkə kimi qiymətləndirir.
Putin danışıqlara çox da meyilli deyil
Kansler Mers, vəzifəyə başladıqdan sonra indiyədək Putinlə heç bir birbaşa təmas qurmayıb. O, dəfələrlə Rusiyanı Ukraynadakı hücumlara son qoymağa çağırıb. Bir çox Qərb ölkələri isə, Rusiya Ukraynanı bombalamaqda davam etdiyi və Putin maksimalist tələblərindən imtina etmədiyi müddətcə, onunla danışıqları rədd edirlər.
Putin son açıqlamasında bəyan edib ki, Ukrayna münaqişəsi kontekstində istənilən tərəflə, o cümlədən Ukrayna Prezidenti Volodimir Zelenski ilə də görüşməyə hazırdır.
Lakin ötən həftələrdə Türkiyədə keçirilən danışıqlarda Ukrayna Prezidenti Zelenski ilə birbaşa görüş imkanı olsa da, Kreml yalnız zəif tərkibli nümayəndə heyəti göndərmişdi. Eyni şəkildə, Ukraynanın və Qərbin 30 günlük atəşkəs təklifinə də Putin reaksiya verməmişdi. Bu səbəbdən, bir çox müşahidəçilər Kremli danışıqları qəsdən ləngitməkdə ittiham edirlər.
Putin İrana dinc nüvə dəstəyi təklif edir
Putin həmçinin İsrail ilə İran arasında gərginliklə bağlı fikirlərini bölüşüb. O deyib ki, Rusiya İranın nüvə enerjisindən yalnız dinc məqsədlərlə istifadə etməsinə yardım təklif edir. Beləliklə, İsrailin İranın nüvə silahına sahib olması ilə bağlı narahatlığı aradan qaldırıla bilər. Putin bildirib ki, bu təklifi həm İsrailə, həm də ABŞ-a çatdırıb.
Rusiya Prezidenti, İsrailin son hava hücumlarının İran hakimiyyətini devirməyə səbəb olmayacağına əmin olduğunu bildirib: “İran cəmiyyəti öz siyasi rəhbərliyinin ətrafında birləşib”, – deyə Putin vurğulayıb.
Qeyd edək ki, Rusiya İranın yaxın müttəfiqidir və Tehran uzun müddət Ukraynadakı müharibə üçün Rusiyaya silah və dronlar göndərib. Bu səbəbdən Avropa İttifaqı 2024-cü ildə İrana qarşı sanksiyalar tətbiq edib. Avropa dövlətləri bu səbəbdən Putini Yaxın Şərq münaqişəsində vasitəçi kimi qəbul etmir.
Sarvan Səmədoğlu
TEREF