“Azərsu” Açıq Səhmdar Cəmiyyəti Bakı şəhərində yağış sularının yığılma təhlükəsi olan avtomobil yolları və ərazilərdə səth sularının kənarlaşdırılması üçün kompleks tədbirlərin icrasına başlayıb.
Publika.az xəbər verir ki, “Azərsu” ASC-nin Planlaşdırma və keyfiyyətə nəzarət departamentinin rəisi Bahadur Kəngərli bil bu layihələr hazırlanarkən intensiv yağıntılar zamanı subasma hallarının baş verdiyi kritik ərazilər müəyyənləşdirildiyini deyib:
“Bakı şəhərinin bəzi ərazilərində yağış və kanalizasiya infrastrukturunun olmaması intensiv yağıntılar zamanı problemlər yaradırdı. Subasma hallarının aradan qaldırılması məqsədilə “Azərsu” ASC tərəfindən mütəmadi profilaktiki tədbirlər görülsə də, kompleks layihələrin reallaşdırılmasına ehtiyac vardır. Bu baxımdan aidiyyatı qurumların mütəxəssisləri ilə birlikdə subasma halları daha çox müşahidə olunan ərazilər, su yığılmalarının səbəbləri araşdırılmış və problemin həlli yolları müəyyənləşdirilmişdir. Eyni zamanda Abşeron yarımadasında bir sıra göllərin su səviyyəsinin tənzimlənməsi nəzərə alınmışdır”.
Qısa müddətdə Səhmdar Cəmiyyətin mütəxəssisləri tərəfindən layihələr hazırlanmış və inşaat işlərinə başlanılmışdır. Bu layihələr arasında göllərin su səviyyəsinin tənzimlənməsi xüsusi əhəmiyyət kəsb edir.İntensiv yağıntılar zamanı suyun səviyyəsi artaraq subasma halları baş verən göllərdən biri də Abşeron rayonunun Məhəmmədi kəndində yerləşən eyniadlı göldür. Səhmdar Cəmiyyətin sifarişi əsasında göldə su səviyyəsinin tənzimlənməsi üçün 1000-1200 millimetr diametrli borularla ümumi uzunluğu 4,7 kilometr olan kollektorun tikintisinə başlanıb. Kollektorun göldən açıq kanala qədər olan hissəsi qısa müddətdə tikilərək istismara verilib. Göldə suyun səviyyəsi azaldıqdan sonra kollektor gölün içərisinə doğru daha 200 metr məsafədə uzadılacaq və burada sugötürücü kamera tikiləcək.
Eyni zamanda Böyükşor gölünün səviyyəsinin tənzimlənməsi layihəsi çərçivəsində 1,4 km uzunluğunda kanalizasiya kollektorunun tikintisi yekunlaşmışdır. Bu layihə çərçivəsində digər infrastrukturların yaradılması işləri həyata keçirilir. Bu ilin payız mövsümünə qədər layihələr üzrə nəzərdə tutulmuş işlərin başa çatdırılması planlaşdırılır. Bu layihələrin icrası nəticəsində subasma təhlükəsi olan ərazilərdə su yığılmalarının qarşısı alınacaq, göllərin daşması və yaşayış evlərinə ziyan vurması kimi təhlükələr aradan qaldıracaq.
İcra olunacaq layihələr:
1. Ziya Bünyadov prospekti boyu kollektorun tikintisi.
2. Nərimanov rayonu Əliyar Əliyev küçəsi boyu kollektorun tikintisi.
3. Böyükşor gölünün səviyyəsinin tənzimlənməsi üçün kollektorun tikintisi.
4. Binəqədi şosesi boyu kollektorun tikintisi.
5. Yasamal rayonu Dadaş Bünyadzadə küçəsi boyu kollektorun tikintisi.
6. Sabunçu rayonu ərazisində kollektorun tikintisi.
7. Məhəmmədi gölündə su səviyyəsinin tənzimlənməsi üçün kollektorun tikintisi.
8. Taşağıl və Böyükşor gölünün su səviyyəsinin saxlanılması və su keyfiyyətinin yaxşılaşdırılması üçün sistemlərin tikintisi.
9. Sabunçu rayonu “Şuşa” şəhərciyinin ətraf ərazilərində yağış sularının kənarlaşdırılması üçün kollektorun tikintisi.
10. Ramana Südçülük Sovxozunun ərazisində yağış suları kollektorunun tikintisi.
11. Yasamal rayonu Əhməd Cəmil küçəsi boyu yağış suları kollektorunun tikintisi.
12. Xətai rayonu Yusif Səfərov küçəsi boyu yağış suları kollektorunun tikintisi.
13. Xətai rayonu Kazımağa Kərimov küçəsi boyu yağış suları kollektorunun tikintisi.