İranın Kirmanşah şəhərində polis əməkdaşının avtomobil sərnişinlərinə tapançadan atəş açması nəticəsində 1 nəfər həlak olub, 2 nəfər yaralanıb.

Teleqraf.com xəbər verir ki, hadisə 3 gün əvvəl baş versə də, bu barədə xəbər yenicə yayılıb.

İrandakı hüquq müdafiəçilərinin yaydığı xəbərə əsasən, hadisə avqustun 19-da, sübh saatlarında Kirmanşahın taxta bazarında baş verib. Yerli hüquq-mühafizə orqanlarının naməlum səbəbdən saxladığı avtomobilin sərnişinləri ilə bir polis əməkdaşı arasında mübahisə yaranıb.

Polis əməkdaşı tapançasını çıxararaq gözlənilmədən sərnişinlərə atəş açıb. Nəticədə Kirmanşah şəhər sakinləri – 24 yaşlı Məcid Yaqubniya yerindəcə həlak olub, 23 yaşlı Miad Pələngi və 25 yaşlı Miad Şaveysi ağır bədən xəsarəti alaraq xəstəxanaya yerləşdirilib.

Sərnişinlərə atəş açan polis əməkdaşının adı, onun saxlanılıb-saxlanılmaması və hadisənin detalları barədə əlavə məlumat yayılmayıb.