Çempionlar Liqasının III təsnifat mərhələsinin cavab matçı çərçivəsində keçirilən "Qarabağ" - "Viktoriya" oyununu (1:1) izləyənlər arasında millət vəkili Qənirə Paşayeva də olub.

Qarşılaşmanı Ağdam klubunun forması ilə izləyən xanım siyasətçi matçdan sonra APA-nın saytının da suallarını cavablandırıb.

- Matç barədə fikirləriniz necədi?

- 90 dəqiqə həyəcanlı keçdi. Ancaq son 10 dəqiqə daha həyəcanlı idi. Komandamız gözəl oynadı. "Qarabağ"ın təsəlli verəcək durumu yoxdu. Mən futbolu azarkeş kimi izləyirəm. Bu oyun "Qarabağ"ın haqqı idi. Təəssüf ki, qol imkanlarını boşa verdik. Əsas odu ki, avrokuboklarda mübarizəmiz davam edir.

- Siyasətdə yaşanan stressi futbolda ata bildinizmi?

- Komandamıza azarkeşlik edirik. İstəyirik ki, "Qarabağ"ın uğurları bol olsun. Bu komanda hamımızındı. Hər birimiz fərqli-fərqli komandalara azarkeşlik edə bilərik. Ancaq "Qarabağ"ın yeri başqadı. Çünki "Qarabağ" təkcə futbol klubu deyil.

- "Qarabağ"da xüsusi rəğbət bəslədiyiniz futbolçu varmı?

- Var, ancaq adlarını çəkməyəcəm. Qarşılaşmadan sonra futbolçuların yanına gedib onları təbrik etdim. Qurban Qurbanov çox gözəl komanda yaradıb. Futbolçular da çox gözəl oynadı. Ən önəmlisi odu ki, Avropada səviyyəli komandamız var. Artıq qarşılaşdığımız komandalar da "Qarabağ"ın çətin rəqib olduğunu qəbul edirlər. Çexlər də şansa şükr etsinlər. Onlar şans sayəsində mərhələ adladı.

- Maraqlıdı ki, "Qarabağ"ın 7 nömrəli formasını geyinmisiniz. Bunun özəl bir səbəbi varmı?

- Bu, "Qarabağ"ın hədiyyəsidi. Bunu onlardan soruşsun (gülür).

- Özünüz də qeyd etdiniz ki, "Qarabağ" təkcə futbol klubu deyil. Komandanın adı da siyasi baxımdan ciddi önəm daşıyır...

- "Qarabağ"a dövlətin dəstəyi hər zaman var. Dövlət bu yöndə dəstəyini komandadan əksik etmir. Gələcəyə doğru bu dəstək daha artacaq. Ancaq azarkeşlərin də dəstəyinin artması lazımdı. Sizin özünüz də xarici klubları izləyirsiniz. Bilirsiz ki, həmin klubların ayaqda qalmasında azarkeşlərin müstəsna rolu var. Elə anlar olur ki, komanda çöküş anını yaşayanda azarkeşlər onu ayaqda saxlayır. Çox şükür ki, "Qarabağ"ın belə bir problemi yoxdu. Bu gün azarkeşlərə baxıb sevindim. "Qarabağ"ı çox yaxşı dəstəklədilər. Bu dəstəyi hər zaman etmək lazımdı. Ancaq bir durum heç xoşuma gəlmədi. Matçın 85-ci dəqiqəsində bəzi azarkeşlər stadionu tərk etməyə başladı. Komandanın yanında olan adam final fitinə qədər stadionda, tribunada olmalıdı.

- Ölkənin ən öndə gedən jurnalistlərindən olmusunuz. Jurnalist kimi "Qarabağ"ı necə tənqid edərdiniz?

- "Qarabağ"ı tənqid etmək istəmirəm. Bilirsiz, biz hər şeyə Azərbaycandan baxırıq. Bu yarış Azərbaycan çempionatı deyil. Rəqib komandaları dəyərləndirmək lazımdı. Qarşımızdakı heç də zəif rəqib deyildi. Bu oyun "Qarabağ"ın haqqı idi. Biz əsasən komandanı "yıpratmağa" çalışırıq. Onsuz da onlar məyus olublar. Yaxşı oynadıqları oyunu əldən verdilər. Əksinə, futbolçularımıza dəstək olmalıyıq.