Bakıda təşkil olunan bədii gimnastika üzrə Avropa kubokunun ilk günü arxada qalıb.

İdman.biz xəbər verir ki, Azərbaycan yığmasının lideri Zöhrə Ağamirova üç növdə finala vəsiqə qazanıb.

O, halqa, top və lentlərlə çıxışda həlledici mərhələdə çıxış etmək hüququna yiyələnib. Zöhrə topla yarışda 33,000 bal toplayaraq, dördüncü olub. Ağamirova lentlə çıxış zamanı 31,450, halqa ilə isə 32,900 xalla Top-8-də yer alıb.

Bu nəticələrdən sonra yığmamızın lideri çoxnövçülükdə də finalda yarışacaq. Zöhrə dörd alətlə çıxışın cəmində 127,100 bal toplayıb. Millimizin daha bir üzvü Kamilla Seyidzadə (119,450) də həlledici mərhələyə vəsiqə qazanıb.

Qeyd edək ki, bu gün Avropa kubokunda ilk medalçılar bəlli olacaq.

03.05.2024, 10:00
Aprelin 3-də Bakıda ilk dəfə keçirilən bədii gimnastika üzrə Avropa Kubokuna start verilib.

AZƏRTAC xəbər verir ki, Milli Gimnastika Arenasında təşkil edilən yarışda 37 ölkəni təmsil edən 160 idmançı bacarığını nümayiş etdirir.

Azərbaycanı turnirdə fərdi proqramda Zöhrə Ağamirova və Kamilla Seyidzadə, qrup hərəkətləri proqramında isə Zeynəb Hümmətova, Güllü Ağalarzadə, Darya Sorokina, Yelizaveta Luzan, Ləman Əlimuradova və Kamilla Əliyevadan ibarət komanda təmsil edir.

Üçgünlük kubokun proqramına əsasən, böyük fərdi gimnastlar “çarpaz-qarşılaşmalar” sistemi ilə mübarizə aparırlar. Bununla da onlar təsnifat yarışlarından sonra final mərhələsinə yüksəlmək üçün bir-biriləri ilə yarışacaqlar.

Avropa Kubokunda qaliblər fərdi və çoxnövçülük proqramında, eləcə də komanda hesabında müəyyənləşəcək. Qaliblərə medal və hədiyyələrlə yanaşı pul mükafatı da veriləcək. Çarpaz qarşılaşmalarda qalib 8000, ikinci yeri tutan 5000, üçüncü yeri tutan 3000, dördüncü yeri tutan 2000, 5-8-ci yerləri tutanların hər biri 1000, 9-16-cı yerləri tutanların hər biri 500 avro qazanacaq. Böyüklərdən ibarət qrup hərəkətləri komandaları arasında çoxnövçülük üzrə qalib 5000, gümüş medal qazanan 3500, bürünc medalçı 2500 avronun sahibi olacaq. Gənc yaş qruplarının yarışında komanda hesabında qalibi 1300, ikinci yeri tutanı 1000 və üçüncü yerin sahibini isə 700 avro gözləyir.