2025-ci ilin ilk rübündə İspaniyanın Azərbaycan iqtisadiyyatına birbaşa xarici investisiyaları 1,08 milyon ABŞ dolları təşkil edib. Bu göstərici 2024-cü ilin eyni dövrü ilə müqayisədə təxminən 13 dəfə çoxdur.
İqtisadiyyat.az xəbər verir ki, məlumatı Azərbaycan Mərkəzi Bankı yayıb.

Həmin dövrdə İspaniyadan gələn sərmayələr Azərbaycanın ümumi xarici investisiya portfelində cəmi 0,1% paya malik olub.

Eyni zamanda, Azərbaycan da İspaniya iqtisadiyyatına yatırımlarını əhəmiyyətli şəkildə artırıb – bu ilin ilk üç ayında 20,9 milyon ABŞ dolları sərmayə qoyulub ki, bu da ötən ilin eyni dövrü ilə müqayisədə 2,6 dəfə artım deməkdir. Bu göstərici ümumi xarici sərmayələrdə 6,6% paya sahibdir.

Xatırladaq ki, 2024-cü ildə İspaniyadan Azərbaycana cəmi 84 min dollar, Azərbaycandan isə İspaniyaya 8 milyon dollar investisiya yatırılmışdı. Bu ilin ilk rübündə isə Azərbaycan iqtisadiyyatına ümumilikdə 1,52 milyard dollar, xarici iqtisadiyyatlara isə 315 milyon dollar birbaşa sərmayə yönəldilib.