Fransanın paytaxtı Parisdə törədilən silsilə teraktlarla bağlı yeni məlumatlar üzə çıxıb.
Axar.az xəbər verir ki, serbiyalı silah istehsalçısı “Zastava”nın direktoru Milojko Brzakoviç hücumda istifadə olunan bir tapançanın ABŞ-ın “Sentri İntenəşnl Arms”a məxsus olduğu açıqlayıb.
Onun sözlərinə görə, hücum zamanı istifadə olunan M92 tipli tapança 2013-cü ildə ABŞ şirkəti tərəfindən sifariş olunub və elə həmin il “Zastava” fabriklərinin birində hazırlanaraq ABŞ-a göndərilib.
Hazırda Mərkəzi Florida ştatında yerləşən şirkətin Paris hücumları ilə əlaqəli ola biləcəyi araşdırılır. Digər tərəfdən sözügedən silahların ABŞ-a göndərildiyi ortaya çıxsa da, silahların yenidən Avropaya qayıtması qaranlıq qalır.
Xatırladaq ki, “Sentri İntenəşnl Arms” şirkətinin adı 1980-ci illərdəki İran-Kontras qalmaqalında da hallanıb. Şirkət 1980-1986-cı illərdə Reyqan administrasiyasındakı bəzi qüvvələrin İrana qarşı tətbiq olunmuş embarqoya baxmayaraq bu ölkəyə silah satıb.