İqtisadiyyat və Sənaye Nazirliyi siqaretin yenidən bahalaşması ilə bağlı yayılan xəbərlərə münasibət bildirib.

Nazirliyin Mətbuat Xidmətinin rəhbəri Abbas Əliyev “Qafqazinfo”ya açıqlamasında qeyd edib ki, tütün məmulatlarının qiymətləri tənzimlənən mal və xidmətlərin siyahısına daxil deyil: “Siqaretin qiyməti bazarda tələb və təklif əsasında formalaşır. Bununla belə, nazirlik istehlak bazarında süni qiymət artımına yol verilməməsi üçün nəzarət tədbirlərini davam etdirir”.

Qeyd edək ki, siqaretin və bir sıra ərzaqların qiymətində 50-70 faiz artım müşahidə olunub.

Xatırladaq ki, ötən ilin sonunda Azərbaycanda baş verən ikinci devalvasiyadan sonra gömrük və vergi sistemində şəffaflığın təmin ediləcəyi, monopoliyanın aradan qaldırılacağı ilə bağlı hökumət rəsmiləri tərəfindən açıqlamalar verilmişdi. Gözlənilirdi ki, idxal olunan bir çox məhsullar kimi siqaretin də ölkəyə gətirilməsində tam şəffaaflıq təmin ediləcək, bu isə avtomatik olaraq qiymətlərin ciddi şəkildə aşağı düşməsinə səbəb olacaq...

***

Siqaret bazarında böyük pay sahibi olan şirkətlərdən biri "Japan Tobacco International Baku"dan "APA"ya bildirilib ki, tütün məmulatlarının bahalaşmasına səbəb dolların real məzənnəsinin artımı ilə bağlıdır.

Məlum olduğu kimi, tütün məmulatlarının istehsalı idxala bağlı olan prosesdir. Artıq uzun müddətdir davam edən dolların bahalaşması bu sahəyə təsir etməkdədir.